Эрүүл мэндийн яамны газрын дарга Л.Энхсайхан сэтгүүлчдийн асуултад хариуллаа.
-Хатуу хөл хориог 14 хоногоор үргэлжлүүлэхээр боллоо. Энэ хугацаанд өвчлөл буурах уу?
-Хатуу хөл хориог сулруулах тодорхой хэмжээний шалгуурууд бий. Тэр шалгуур хэмжээнд хүрээгүй учраас хатуу хөл хориог үргэлжлүүлэх санал гаргасан. Иргэн таны төлөвлөсөн ажилд төвөг учруулж байгаадаа хүлцэл өчиж байна. Гэхдээ хатуу хөл хориог тогтоох нь амаргүй боловч үргэлжүүлэхээс өөр аргагүй нөхцөл байдал үүсээд байна. Нэг хүн хэдэн хүнд халдвар тараах вэ гэх тооцоолол бий. Энэ тооцооллоор 1.2 байсан бол хатуу хөл хорио тогтоосноор 1 болж буурсан үзүүлэлт гарсан. Хатуу хөл хорионы үр дүн гарах магадлал гарч байна. Хэрэв хөл хорионы дэглэмийг үр дүнтэй хэрэгжүүлж чадвал үр дүн бүрэн дүүрэн гарна. Гол нь хөл хорионы стратеги их чухал.
-Халдвараар өвчилсөн үед D болон С витамин хэрэглэхийг зөвлөж байгаа. Тухайлбал, D витаминыг 4000 тунтайгаар хэрэглэдэг. Тэгвэл эмчийн бичиггүйгээр дээрх витаминуудыг уух нь хэр зохистой вэ?
-Гаднаас эм, бэлдмэл хэрэглээд дархлаа тогтдог гэсэн ойлголт иргэдийн дунд бий. Биед өөрийн их хүч бий. Хэрэв ядарч байвал сайн унтаад амрах, ажил амралтын дэглэмээ зохицуулах. Шингэн зүйл сайн уух, хэт их ядрахгүй байх гэх мэт. Энэ дэглэмийг баримталбал заавал гаднаас эм, тариа хэрэглээд байх шаардлагагүй.
Зарим витамин, эрдэс бодис биед дутагдсан тохиолдолд дархлааны үйл ажиллагаа сулардаг. Жишээ нь амин дэм дутагдсан хүмүүст халдварт бус болон халдварт өвчнөөр өвлөх шинж тэмдэг илрэх нь бий. Ер нь D амин дэмийг өдөрт 1000-2000 олон улсын нэгжээр хэрэглэхэд зохистой. 500 олон улсын нэгжээр хэрэглэх нь өвчнөөс урьдчилан сэргийлэх тун гэж үзэх нь бий. Эм, бэлдмэлийг аль болох эмчийн заавраар хэрэглэх хэрэгтэй. Энэ нь илүү үр дүнтэй. Эрдэмтдийн судалгаагаар ковид-19 өвчний үед D болон цайрын дутагдалтай хүмүүс хүнд өвчлөх, ор хоног нь урт байгаа учраас D болон C витамин зөвлөж байгаа. Хэт өндөр тунгаар хэрэглэж хордлогод орчихооргүй бол цайрын бэлдмэл хэрэглэхийг зөвлөж байгаа. Гол нь энэ бүхнийг эмчийн заавраар хэрэглэх хэрэгтэй.
Хүнсний ислэг буюу арвайн гурил, байцаа, өргөст хэмхийг өдөрт 30 грамм орчим хэрэглэхэд зохистой. Энэ нь хүний биед байдаг ашигтай бичил биетийн үйл ажиллагааг дэмжсэнээр дархлаанд эерэг нөлөө үзүүлдэг. Монголчууд сүү, цагаан идээ мөн хэрэглэдэг. Мөн монгол хүний уужуу тайван байдал сүү, цагаан идээ хэрэглэж байсантай холбоотой байдаг. Гэвч сүү, цагаан идээний хэрэглээ нийслэлийн иргэдийн хувьд бага. Энэ хэт амархан уурлах, бухимдах, стрессдэх байдалд нөлөөлж болох талтай. Мөн цахим орчинд аль болох бага байх нь тухайн хүний эрүүл мэндэд ашигтай.
-Вакцины татан авалтын талаарх мэдээллийг өгөхгүй юу?
-СпутникV вакцины 900.000-1.000.000 тунг оруулж ирэхээр Засгийн газрын түвшинд гэрээ хэлэлцээр хийж байна. Нэмээд 300.000 тун бэлэглэнэ гэх мэдээлэл бий. Гэхдээ хэзээ орж ирэх нь тодорхойгүй байна.
