Хүүхдийн оролцох эрхийг хангах, хүүхэд өөрийн эрх ашигт нөлөөлж байгаа аливаа асуудлаар шийдвэр гаргах үйл явцад сайн дурын үндсэн дээр оролцох бололцоог бий болгохын тулд Нийслэлийн Хүүхдийн төлөө зөвлөлөөс 2017 оны 05 дугаар сарын 30-ний өдрийн 03 тоот тогтоолоор жил бүрийн 5 дугаар сарын сүүлийн 7 хоногийн Лхагва гарагийг Нийслэлийн “Хүүхдээ сонсох өдөр” болгон тэмдэглэж байхаар шийдвэрлэсэн.
Тэгвэл энэхүү өдөр өнөөдөр буюу 5 дугаар сарын 26-ны өдөр тохиож байна. Шийдвэр гаргах түвшинд хүүхэд үзэл бодол, дуу хоолойгоо илэрхийлэх, мэдээлэл авах, эвлэлдэн нэгдэх эрхээ эдлэх боломжийг хангах зорилгоор “Хүүхдээ сонсох өдөр” –ийг угтан дүүрэг бүрд хүүхдийн чуулганаа цахимаар зохион байгуулсан.
Уг чуулганаас гарсан санал санаачилгаа Нийслэлийн засаг дарга бөгөөд Нийслэлийн хүүхдийн төлөө зөвлөлийн тэргүүнд танилцуулах уулзалтыг зохион байгуулах гэж байна.
Нийслэлийн Хүүхдээ сонсох өдөр 4 дэх жилдээ зохион байгуулагдаж байна. Энэ өдөр зөвхөн төр захиргааны байгууллагууд хүүхдээ сонсоод зогсохгүй эцэг эхчүүд та бүхний хүүхдийнхээ дуу хоолой, үзэл бодлыг сонсож, тэдэнд тулгамдаж буй асуудлыг нь шийдвэрлэж өгөхийг уриалж байна.
