tsenzuurmn
НҮБ-ын Цөлжилттэй тэмцэх конвенцын (UNCCD) Талуудын 17 дугаар бага хурлын (COP17) “Газар ба ард түмний өдөр”-ийн хүрээнд “Залуучууд, газар шороо ба амьжиргаа” сэдэвт өндөр түвшний хуралдаан 2026 оны 8 дугаар сарын 26-ны өдөр Action Dome-д зохион байгуулагдлаа. Тус арга хэмжээнд Соёл, спорт, аялал жуулчлал, залуучуудын сайд Ж.Алдаржавхлан оролцож, Монгол Улсын Засгийн газрыг төлөөлөн албан ёсны үг хэллээ.
Сайд хэлсэн үгэндээ дэлхийн хуурай газрын 40 хүртэлх хувь нь доройтолд өртөж буйг сануулаад, Монгол Улсын нийт нутаг дэвсгэрийн 70 гаруй хувийг эзэлдэг бэлчээрийг хамгаалах нь нүүдлийн соёл, малчдын амьжиргааны гол үндэс болохыг онцлов. Монгол Улсын хүн амын 28.6 хувийг эзэлж буй залуучуудыг, тэр дундаа залуу малчдыг газрын доройтлын эсрэг бодлого, дижитал технологи, ногоон ажлын байртай уялдуулан хөгжүүлэх гурван үндсэн чиглэлийг танилцуулсан юм.
Энэ хүрээнд салбарын яам НҮБ-ын Хөгжлийн хөтөлбөр болон бусад түншүүдтэй хамтран Булган аймгийн Гурванбулаг сум дахь судалгааны төвд түшиглэсэн “Youth Rangelands & Resilience Initiative” (YRRI) буюу залууст бэлчээрийн менежмент, бизнесийн ур чадвар олгох санаачилгыг албан ёсоор эхлүүллээ.
Хуралдааны бас нэгэн онцлох үйл явдал нь UNCCD-ийн Залуучуудын бүлгийн (UYC) төлөөлөгч Рико Рау “COP17 Залуучуудын мэдэгдэл”-ийг оролцогч талуудад албан ёсоор танилцуулсан явдал байв. Үүний зэрэгцээ Европын Холбоо болон UNCCD-ийн Нарийн бичгийн дарга нарын газар зэрэг олон улсын байгууллагууд COP18 хүртэл залуучуудыг дэмжих, тэднийг шийдвэр гаргах түвшинд оролцуулах шинэ амлалтуудаа өгснөөр арга хэмжээ өндөрлөлөө.
0 cэтгэгдэлтэй