Коронавирусийн халдварт өртөгсдийн тоо эрс нэмэгдэж, сүүлийн өдрүүдэд 200 дээш тохиолдол бүртгэгдэх болсон. Үүнтэй холбоотойгоор эмнэлгүүдийн орны ачаалал эрс нэмэгдэж, хөнгөн өвчитнүүдийг гэрээр нь тусгаарлан эмчлэх Эрүүл мэндийн сайдын тушаал гарсан билээ.
Өнөөдрийн байдлаар коронавирусийн халдвартай нь батлагдсан 373 хүн гэрээр эмчлүүлж байна. Эдгээр иргэнд ЭРүүл мэндийн яам, ХӨСҮТ, НЭМГ хамтран өрхийн эмнэлгээр дамжуулан өдөр тутам хяналт тавьж ажилладаг гэнэ.
Засгийн газрын өчигдрийн хуралдаанаар зургаан эмнэлгийг 1,440 ороор өргөтгөж, Уламжлалт анагаах ухааны зургаан эмнэлгийн 400, есөн тусгаарлах байранд 620 орыг нөөцөд авчээ.
Тусгай үүргийн нислэгээр ирэх иргэдийг тусгаарлахаар 11 зочид буудалд 932 ор бэлтгэж, Дотоод хэргийн их сургуулийн оюутны дотуур байранд 300, Батлан хамгаалах их сургуулийн сонсогчдын байранд 200, Яармаг дахь спортын ордонд 400, Бөхийн өргөөнд 100 ор дэлгэхээр бэлдэж байна.
