Эрүүл мэндээ хамгаалж, эдийн засгаа сэргээх 10 их наядын цогц төлөвлөгөөг Ерөнхий сайд Л.Оюун-Эрдэнэ олон нийтэд танилцууллаа.
Тэрбээр “Засгийн газар байгуулагдаад 4 тодорхой зорилт дэвшүүлсэн.
- Цар тахлыг богино хугацаанд даван туулах цогц төлөвлөгөө боловсруулна
- Эдийн засгаа сэргээх төлөвлөгөөг танилцуулна
- Дундаж давхаргыг сэргээх үндэсний тогтолцоо бүрдүүлнэ
- Шударга ёс цахим засаглалыг хэрэгжүүлэх зорилт тавьсан.
Миний бие эдгээр 4 зорилтод хүрэхийн тулд чихэр мэт амттай бус давс мэт шорвог ч зайлшгүй хийгдэхээс өөр гарцгүй шийдвэрүүдийг гаргахын төлөө ажиллана гэдгээ илэорхийлж байсан.
Өнөөдөр Засгийн газар эхний 2 зорилтын хүрээнд эрүүл мэндээ хамгаалж, эдийн засгаа сэргээх 10 их наядын төлөвлөгөөг өнгөрсөн 2 долоон хоногийн хугацаанд бэлдэж дууслаа. Энэ төлөвлөгөө бүх хүнд таалагдахгүй. Таалагдах ч боломжгүй.
Засгийн газрын шинэ бодлогын амин сүнс нь халамж биш ажлын байр. Хамгийн сайн халамж бол баталгаатай, сайн цалинтай ажлын байр гэдэг филисофийн дагуу цаашдаа явах зайлшгүй шаардлагатай. Ажлын байрыг хамгаалах, шинээр олноор бий болгох нь энэхүү төлөвлөгөөний зонхилох хэсэг байх болно.
Цар тахалд нэрвэгдсэн, сульдсан бизнесийн цусны эргэлтийг сэргээж, царцсан эдийн засагтаа дэм үзүүлэх нь энэхүү хөтөлбөрийн гол амин сүнс байх болно. Бидэнд огцом эдийн засгийн өсөлт шаардлагатай. Ингэж байж ажлын байраа хадгалж үлдэнэ. Тиймээс Засгийн газар эдийн засагт шууд үр өгөөжөө нэмэгдүүлэх зорилготой томоохон төслүүдийг яаравчлан эхлүүлэх болно.
Мөн хүний биеийн 70 хувийг ус бүрдүүлдэг шиг өнөөдөр Монголын нийт хүн амын 70 орчим хувийг залуучууд бүрдүүлж байгаа. Цар тахлын үеийн хямралд хамгийн их нэрвэгдэж байгаа нь ч залуучууд. Тиймээс залуучуудын хөтөлбөр эрхлэлтийг дэмжих, орон сууцжуулах, тогтвортой орлоготой болгох нь энэхүү төлөвлөгөөний гол сүнс байх болно. Хөтөлбөр 3 жилд хэрэгжинэ.
Цар тахалд бууж өгөх биш хариу үйлдэл үзүүлэх хэрэгтэй. Тийм учраас шинэ бодлого, шинэ эхлэл, шинэ хандлага хэрэгтэй.
Энэ төлөвлөгөөг Засгийн газар дангаараа хэрэгжүүлж чадахгүй. Тийм учраас УИХ, Монголбанктай хамтран ажиллана” гэлээ.
