COP17: Залуучуудын хөдөлмөр эрхлэлт, ногоон ажлын байрны асуудлаар гурван талт хэлэлцүүлэг боллоо

Улаанбаатар хотноо болж буй НҮБ-ын Цөлжилттэй тэмцэх конвенцын Талуудын 17 дугаар бага хурал (COP17)-ын үеэр “Залуучуудын хөдөлмөр эрхлэлт, нутгийн иргэдэд түшиглэсэн аялал жуулчлалаар дамжуулан ногоон ажлын байр бий болгох нь” сэдэвт гурван талт хэлэлцүүлэг зохион байгуулагдлаа. Арга хэмжээг БНСУ-ын Засгийн газрын санхүүжилтээр Олон улсын хөдөлмөрийн байгууллагаас хэрэгжүүлж буй “Залуучуудын хөдөлмөр эрхлэлтийг дэмжих” (YEPP) төслийн хүрээнд зохион байгуулсан юм.

Хэлэлцүүлэгт Засгийн газар, ажил олгогч болон ажилтны төлөөллийн байгууллагууд оролцож, Монгол Улсын хөдөлмөрийн зах зээлийн өөрчлөлт, залуучуудын хөдөлмөр эрхлэлтийн тэргүүлэх чиглэл, ногоон эдийн засагт шилжих шударга шилжилтийн үйл явцын талаар нээлттэй санал солилцов. Тэр дундаа нутгийн иргэдэд түшиглэсэн аялал жуулчлалыг хөгжүүлж, ногоон ажлын байр бий болгох боломж болон тулгамдаж буй асуудлуудыг нээлттэй хэлэлцсэн байна.

Хэлэлцүүлгийн үеэр онцолсон гол асуудлууд:

• Ур чадвар ба дэмжлэг: Залуучуудыг шинээр бий болж буй ногоон ажлын байранд шаардагдах ур чадвараар хангаж, зохистой хөдөлмөр эрхлэлтэд шилжихэд нь бодитой дэмжлэг үзүүлэх.
• Ажиллах хүчний эрэлт: Аялал жуулчлалын салбарт ажиллах хүчний эрэлт өсөж байгаа ч мэргэшсэн, ур чадвартай ажилтан дутагдалтай байгааг анхаарах.
• Орон нутгийн боломж: Орон нутгийн залуус нутаг дэвсгэрийнхээ онцлогт тохирсон аяллын бүтээгдэхүүн бий болгож, малчин өрх, жижиг бизнесүүдтэй хамтран орлого олох өргөн боломжтойг талууд санал нэгтэйгээр тодорхойллоо.