Гэр хороололд анхны гал унтраах, аврах анги нээгдлээ

Нийслэлийн Чингэлтэй дүүргийн Онцгой байдлын хэлтсийн Гал түймэр унтраах, аврах 86 дугаар ангийн шинэ байрны нээлтийн ажиллагаа болж өнгөрлөө.

Чингэлтэй дүүргийн Иргэдийн Төлөөлөгчдийн Хурлын 2024 оны 09 дүгээр сарын 25-ны өдрийн 43 тоот тогтоолоор тус дүүргийн 21 дүгээр хороонд Гал түймэр унтраах, аврах 86 дугаар ангийг байгуулахаар шийдвэрлэсэн. Энэхүү ангийн барилга нь орчин үеийн стандартад нийцсэн, төмөр бетон хийцтэй, 2100 гаруй квадрат талбайтай, А, В, С блокоос бүрдсэн, дээд давхартаа алба хаагчдын орон сууцыг шийдвэрлэсэн, ажил үүргээ гүйцэтгэхэд бүхий л нөхцөл боломжийг хангасан. Гал түймэр унтраах, аврах 86 дугаар анги нь гэр хороололд баригдаж, ашиглалтад орсон анхны гал анги бөгөөд нийслэлийн хойд чиглэлийн 80 гаруй мянган иргэдэд гамшгаас хамгаалах төрийн үйлчилгээг богино хугацаанд шуурхай, хүртээмжтэй хүргэх боломж бүрдэж байна. Барилгын ажлын гүйцэтгэгчээр “Дуутын нуруу” ХХК ажиллаж, дүүргийн 5,2 тэрбум төгрөгийн хөрөнгө оруулалтаар бүтээн байгуулалтыг хийж гүйцэтгэсэн байна.