АТГ-аас Хөгжлийн банкны чанаргүй зээлийн талаар мэдээлэл хийлээ.
Хэвлэл мэдээлэл, олон нийттэй харилцах ажилтан, комиссар Н.Тэмүүлэн: Монгол Улсын Хөгжлийн банкнаас 2022 оны нэгдүгээр сарын 28-ны өдөр албан бичгээр гэмт хэргийн талаарх гомдол, мэдээлэл ирүүлсэн. Улмаар АТГ-аас хэрэг нээж, мөрдөн шалгах ажиллагаа явуулж байна. Хөгжлийн банкнаас 52 зээлдэгчийг шалгуулахаар АТГ-т хандсан байна. Хэргийн шалгаж эхэлснээс хойш 8.5 тэрбум төгрөгийн зээл эргэн төлөгджээ.
Мөн шалгалтын явцад хуулийн дагуу захиран зарцуулах эрхэд хязгаарлалт тавьсан байна. Тухайлбал,
Үл хөдлөх хөрөнгө 186,
Тээврийн хэрэгсэл 124,
Үйлдвэрийн барилга 1,
Лиценз 1,
Данс 13-ыг битүүмжлэн, захиран зарцуулах эрхийг нь хязгаарлажээ.
АТГ-ын мөрдөн шалгах ажлын хүрээнд 186 үл хөдлөх хөрөнгө, 124 машин, нэг үйлдвэр, нэг лиценз, 13 дансыг битүүмжилж, хязгаарласан. Зээлээ эргэн төлөөгүй 52 иргэн, аж ахуй нэгжийг албан ёсны вэб хуудаст байршуулна. Жишээлбэл, “Хөтөл”, “Бэрэн”, “Ачлалт трейд” гэх мэт.
Иргэдэд анхааруулахад, хөдлөх болон үл хөдлөх хөрөнгө худалдан авахдаа эх үүсвэрийг нь болон банкны барьцаанд бий эсэхийг нь болон хуулийн байгууллагын хязгаарлалт тогтоосон эсэхийг нягтлах хэрэгтэй. Жишээ дурдахад, УИХ-ын гишүүн Б.Ундармаагийн хамаарал бүхий “Гантиг Вилла” хотхоны есөн блок нь Хөгжлийн банкны барьцаанд байгаа. Мөн хуулийн байгуулалтын хязгаарлалт тогтоосон.
Иргэд шүүхийн маргаантай асуудалд холбогдож, хохирох вий. Тус хотхон нь УИХ-ын гишүүн асан Б.Ундармаагийн хамаарал бүхий учраас битүүмжлээд байгаа юм. Мөрдөн шалгах ажиллагаа үргэлжилж байна. Хөгжлийн банкны чанаргүй зээлийн асуудлаас өмнө АТГ-т энэ банктай холбоотой хэд хэдэн хэргийг шалгасан. Жишээлбэл, “Бэрэн” компанийн холбогдох 11 албан тушаалтан болон Хөгжлийн банкны захирал асан Н.Мөнхбат нарын хэргийг шүүхийн байгууллагад шилжүүлсэн.
Н.Мөнхбатын хэрэг шүүхээс гэм буруутайд тооцож, хөөн хэлэлцэх хугацаа дууссан үндэслэлээр хэргийг хэрэгсэхгүй болгосон. Мөн найм орчим тэрбум төгрөгийг Хөгжлийн банкинд буцаан төлөхөөр болсон байдаг. Түүний дараа тус банкны гүйцэтгэх захирлаар ажиллаж байсан Б.Батбаяртай холбоотой хэргийг мөрдөн шалгаж байгаа.
