Энэ сарын 20-ноос өмнө сонголтоо хийгээгүй бол хүүхдийн мөнгийг хуримтлалын данс руу нь шилжүүлнэ
Хүүхдийн мөнгийг 20 мянган төгрөгөөс 100 мянган төгрөг болгон нэмэгдүүлсний дараа Монгол Улсын нийт хүүхдийн тоо 1.2-1.3 сая болж, богино хугацаанд өссөн талаар Үндэсний статистикийн хорооноос мэдээлж байсан билээ. Улмаар энэ онд зөвхөн хүүхдийн мөнгөн тэтгэмжид 1.4 их наяд төгрөг зарцуулах тооцоог ч гаргасан байдаг.
Иргэдийн 30 хувь хүүхдийн мөнгийг хадгаламжид шууд хийдэг бол 70 хувь нь хэрэглээндээ зарцуулдаг байна. Ингэхдээ тодорхой хувь нь архидалтад зарцуулагддаг гэсэн судалгаа бий. Иймээс Засгийн газраас хүүхдийн мөнгийг хуримтлуулж, ирээдүйд нь хөрөнгө оруулах шийдвэр гаргаад байгаа.
Гэхдээ хүүхдийн мөнгийг 2022 оны долдугаар сарын 1-н хүртэл 100.000 төгрөгөөр олгох, цаашид тодорхой хувийг хуримтлуулах юм. Өөрөөр хэлбэл, энэ оны эхний хагас жилийн тухайд эцэг, эх хүсвэл 100,000 төгрөг бүтнээр нь авч болно. Энэ сар буюу нэгдүгээр сард хүсэлтийг хэрхэн авах шийдлүүдийг гаргаж байгаа аж. Тодруулбал, цахим системүүдийг ашиглан хүүхдийн мөнгөө бүтнээр авах эсвэл тодорхой хувийг хуримтлуулах эсээ шийднэ.
Нэг үгээр хэлбэл энэхүү 100 мянган төгрөгийг бүхлээр нь хүүхдийн нэрийн данс дээр хуримтлуулах, эсвэл одоо авч байгаа дансанд шилжүүлж бэлнээр авах боломжтой юм. Дараагийн хагас жилд 50 мянган төгрөгийг хуримтлуулах болон 50 мянган төгрөгийг хүлээж авах сонголт үйлчилнэ.
Та и-баримт аппликэйшн ашиглан дараах зааврын дагуу хүүхдийн мөнгөн хуримтлалыг мөнгөн хэлбэрээр авах хүсэлтээ гаргаарай.
