УИХ дахь МАН-ын бүлэг хуралдлаа. Хуралдаанаас гарсан шийдвэрийн талаар мэдээлэл хийлээ.
МАН-ын бүлгийн дарга Д.Тогтохсүрэн: Өнөөдрийн хуралдаанаар гурван асуудал хэлэлцсэн.
- Шинэ сэргэлтийн эдийн засгийн бодлого болон түүнтэй дагалдах хуулиудын асуудал.
- Ковид-19-ийн хуулийг сунгахтай холбоотой асуудал.
- Үйлчилгээний ажилчид гэрээгээр ажиллахтай холбоотой асуудал
Өнөөдөр Ерөнхий сайдаас оруулж ирсэн эдийн засгийг сэргээх шинэ бодлогын дунд хугацааны хөтөлбөр болон түүнийг дагасан 20 орчим хуульд нэмэлт өөрчлөлт оруулах асуудлыг зарчмын хувьд дэмжлээ. Нийт 47 хуульд яваандаа өөрчлөлт оруулна. Үүний эхлэл болох эхний 20 хуулийн төслийг энэ долоо хоногийн Засгийн газрын хуралдаанд оруулахаар болсон.
Ковидын хуулийг зургаан сарын хугацаатай сунгах шийдвэрийг бүлгийн хуралдаанаас гаргалаа. Тус хуулийг өмнө нь хоёр удаа сунгаж байсан. Дэлхий дахинд коронавирусийн шинэ хувилбар тархаж зарим улс оронд хөл хорио тогтоож байна. Хоёрдугаарт манай хил гааль, экспорт хаагдсан байгаа. Тийм учраас эдийн засагт хүндрэл учирч болзошгүй. Үүнтэй холбогдуулан Цар тахлын хуулийг ирэх оны долоодугаар сарын 1-ныг хүртэл сунгахыг дэмжсэн. Засгийн газрын хуралдаанаар хэлэлцэж УИХ-д өргөн барина.
Ковидын хууль буюу Коронавируст халдварын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуулийг тус халдвараас урьдчилан сэргийлэх, тэмцэх, нийгмийн эрүүл мэндийг хамгаалах, хүний эрхэд тодорхой хязгаарлалт хийх, холбогдох шийдвэрийг шуурхай гаргах, нийгэм, эдийн засагт үзүүлэх сөрөг нөлөөллийг бууруулах, зохион байгуулалтын асуудлыг Засгийн газар онцгой журмаар шийдвэрлэхтэй холбогдсон харилцааг зохицуулах зорилгоор баталсан.
Төрийн үйлчилгээний албан хаагчдыг гэрээгээр ажиллуулах асуудлыг бүлгээр хэлэлцээд 2021 онд авч буй цалин хөлс, нэмэгдлийг 2022 онд бууруулахгүй байх нь зүйтэй гэж үзсэн. Лхагва гарагийн Засгийн газрын хуралдаанаар мөн энэ асуудлыг хэлэлцэнэ.
