УОК-ын Эрдэмтэн судлаачдын багийн гишүүн, ХӨСҮТ-ийн Вирус судлалын лабораторийн судлаач, АУ-ны доктор Г.Цогзолмаа: Коронавирус нь мутаци өөрчлөлтөд орж байна. Вирус олшрох явц эсвэл нэгээс нөгөөд халдварлах явцдаа мутаци өөрчлөлтөд орж байдаг. Хэдий хэмжээний олон хүнд тархана төдийн хэмжээний өөрчлөлтөд орно.
Бүтцийн болон бүтцийн бус гэсэн уургийг агуулсан геномын бүтэцтэй. Үүнд 20 мянга орчим мутаци бүртгэсэн. Энэ олон мутаци өөрчлөлт бүгд аюултай гэсэн үг биш юм.
Хэд хэдэн хэлбэр нь аюултай байдлаар олон улсад тархаад байна. Жишээлбэл, Англи болон Өмнөд Африкт 23 мутаци, 17 амин хүчлийн өөрчлөлттэй хувилбар тархсан.
ХӨСҮТ-ийн вирус судлалын лабораторийн гурван судлаач Япон улсын Халдварт өвчин судлалын үндэсний хүрээлэнд очиж суралцан, өөрийн оронд тархаад буй хувилбарыг судлаад ирсэн.
Анх манайд бүртгэгдэж байсан халдвар нь БНХАУ-ын Ухань хотын хувилбартай төстэй байсан бол цаг хугацаа явах тусам өөрчлөгдөж, “B.1.1.46” гэсэн хэлбэр өргөн тархаад байгааг судалж тогтоосон. Энэ хэлбэр нь дотроо тархалтын ихэсгэдэг болон эмнэл зүйг хүндрүүлдэг хэлбэрийн мутаци болох нь тогтоогдож байна. Гэхдээ энэ хэлбэр нь вакцины эсрэг дархлааг бууруулдаг мутаци биш.
