Ө.Шижир: АН-ыг шинэчлэх цаг болсон учраас даргад нэр дэвшиж байна

УИХ-ын гишүүн Ө.Шижир өнөөдөр /2025.08.29/ мэдээлэл хийлээ.

Тэрбээр “Нэг компани хувьцаа эзэмшигчдийн хурлыг хийхдээ хувьцаа эзэмшигчдээсээ мөнгө авдаггүй. Ардчилсан намын Их хурлыг хийхдээ зардлыг нь өөрсдөө гарга гэдэг байдлаар хандаж байна. Сүүлийн 10, 15 жил ийм байсан учраас Ардчилсан намд өөрчлөлт, шинэчлэл хэрэгтэй. Их хурлаа хийхдээ оролцох хүмүүсээсээ зардлаа гарга гэж болохгүй. Ардчилсан нам улс төрийн байгууллага, институц. Энгийн байдаг л нэг хурлыг ийм байдлаар зохион байгуулмааргүй байна гэдэг байр суурьтай байна.

Бид өөрчлөгдөх,  шинэчлэх цаг болсон. УИХ-ын сонгуульд гурав дараалан ялагдлаа. Одоо бид ялдаг нам болох хэрэгтэй.

Дундговь аймгийн Сайнцагаан суманд байгаа намын гишүүн саналаа өгдөг байх хэрэгтэй. Тэр хүн Ардчилсан намынхаа дүрмээрээ саналаа өгсөн гэдэг итгэл үнэмшилтэй үлдэх хэрэгтэй. Тэгэхгүйгээр 100 хэдхэн хүний хооронд асуудлаа хэлэлцээд, дүрмээ ярьж болохгүй. Та бүхэн анзаарсан бол өчигдөр намын дарга Л.Гантөмөрийн өргөдлийг хэлэлцэхэд ҮБХ нь 247 гишүүнтэй бүрэн бүрэлдэхүүнээрээ байсан. Намын үндсэн дүрэм хэлэлцэхэд 100 хүрэхгүй хүн байсан. Бид ийм байдлыг өөрчлөх хэрэгтэй байна. Тийм учраас би Ардчилсан намын даргад нэр дэвшиж байна. Гэтэл УИХ-ын гишүүн Л.Мөнхбаясгалан, С.Лодойсамбуу нарыг ҮБХ-ны гишүүнээр ажиллаагүй гээд журам гаргаж, нэр дэвших эрхээс хасч байна. Намын үндсэн дүрмээс давсан журам гэж байх ёсгүй. Ардчилсан нам өнөөдөр олон залууст хаалгаа нээж, боломж олгох ёстой. Тэгэхгүй бүгдийг хязгаарлаж болохгүй. Тийм учраас манай нам орон байргүй явж ирлээ. Би ийм өөрчлөлтийг хийх болно. Та бүхэн дэмжээрэй” гэв.