Нийслэл 500 тэрбум төгрөгтэй тэнцэх хэмжээний үнэт цаас гаргахаар төлөвлөж байна

Нийслэлийн ИТХ-ын Зөвлөлийн хурлаар Нийслэлийн үнэт цаас гаргах, арилжаалах талаар хэлэлцлээ.

Энэ талаар Нийслэлийн Засаг даргын Тамгын газрын даргын албан үүргийг түр орлон гүйцэтгэгч И.Баатархүү “Монгол Улсын нийслэл Улаанбаатар хотын эрх зүйн байдлын тухай хуулийн шинэчилсэн найруулгын 13.1-д “Нийслэл хуульд заасан нөхцөл, журмын дагуу үнэт цаас гаргаж болно” гэж заасан байдаг. Энэ дагуу Нийслэлийн Засаг даргын захирамжаар өнгөрсөн тавдугаар сард Ажлын хэсэг байгуулсан. Ажлын хэсгээс журмын төслийг Сангийн яамтай хамтран боловсруулж энэ оны тавдугаар сарын 24-ны өдөр 199-р тогтоолоор “Үнэт цаас гаргах, арилжаалах, мэдээлэх” журмыг батлуулсан. Нийслэлийн Засаг дарга бөгөөд Улаанбаатар хотын Захирагч Д.Сумъяабазар  “Өрийн удирдлагын тухай хууль”-ийн дагуу 6 сарын 21-ны өдөр НИТХ-ын хурлаар саналаа оруулж, 55-р тогтоолоор Нийслэлийн Үнэт цаас гаргах саналыг төлөөлөгчид дэмжсэн. Уг шийдвэрээр Өрийн удирдлагын тухай хуульд заасны дагуу албан бичгийг сангийн сайдад хүргүүлж, Үнэт цаас гаргах шийдвэрийг долоодугаар сарын 19-ны өдрийн Засгийн газрын хуралдаанаар хэлэлцэж, 282-р тогтоолоор зөвшөөрөл олгосон” гэв.

Хууль эрх зүйн орчин бүрдэж, Засгийн газар, Нийслэлийн ИТХ-ын холбогдох шийдвэрүүд, Сангийн сайдын дүгнэлт тус тус гарсан тул  Улаанбаатар хотын төвлөрлийг сааруулах, түгжрэлийг бууруулах, автозамын сүлжээг өргөтгөх, зам, замын байгууламжийн төсөл хөтөлбөрийг санхүүжүүлэх зорилгоор 500 тэрбум төгрөгтэй тэнцэх хэмжээний үнэт цаасыг дотоодын зах зээлд үе шаттай гаргах асуудлыг Нийслэлийн ИТХ-ын нэгдсэн хуралдаанаар шийдвэрлэх юм.

Нийслэлийн 2023 оны төсөвт өөрчлөлт оруулах тухай төслийг танилцууллаа

Нийслэлийн 2023 оны төсөвт өөрчлөлт оруулах тухай төслийг танилцууллаа. Засгийн газрын 2023 оны 282 дугаар тогтоолын дагуу 500 тэрбум төгрөгтэй тэнцэх хэмжээний нийслэлийн үнэт цаасыг дотоодын зах зээлд үе шаттайгаар арилжаалах болсонтой холбогдуулан Нийслэлийн 2023 оны төсөвт дараах өөрчлөлт оруулах шаардлага үүссэн талаар төсөл танилцуулагч тодотголоо. Нийслэлийн Иргэдийн Төлөөлөгчдийн Хурлын 2023 оны 85 дугаар тогтоолоор нийслэлийн 2023 оны төсвийн хөрөнгөөр нийт 576 тэрбум 237.7 сая төгрөгийн 1124 төсөл, арга хэмжээг хэрэгжүүлэхээр баталсан. Нийслэлийн 2023 оны төсөвт өөрчлөлт оруулснаар нийслэлийн үнэт цаас гаргаж, арилжаалах замаар татан төвлөрүүлсэн 429.1 тэрбум төгрөгийн хөрөнгөөр ачаалал өндөртэй 14 цэцэрлэг, 7 Бага сургууль цэцэрлэгийн цогцолбор, 11 Монгол өв уламжлал, ёс заншлын өргөө, 4 сургуулийн барилгын ажлыг санхүүжүүлэх ба Нийслэлийн инженерийн дэд бүтцийн хүртээмж, авто замын байгууламжийн сүлжээг нэмэгдүүлэх төсөл, Налайхын барилгын материалын үйлдвэр технологийн паркийн цахилгаан хангамжийн 2-р ээлжийн барилга угсралтын ажил, Сэлбэ, Дунд голд үерийн далан барих, Сэлбэ сэргэлт төслийн эхний ээлжийн бүтээн байгуулалтын ажил, шахмал түлшний үндсэн түүхий эд болох хагас кокс болон асаагч худалдан авах ажил болон Андеррайтингийн үйлчилгээний зардлыг тус бүр санхүүжүүлэхээр төлөвлөсөн болохыг танилцууллаа.

Мөн өнөөдрийн хурлаар Нийслэлийн газар зохион байгуулалтын төлөвлөгөөнд нэмэлт өөрчлөлт оруулах, Нийслэлийн өмчөөс төрийн өмчид эд хөрөнгө шилжүүлэх, барилга балансаас баланст шилжүүлэх зэрэг асуудлыг НИТХ-ын Зөвлөлийн гишүүд хэлэлцлээ.  Дээрх асуудлуудыг хурлын хороод, намын бүлгийн хурлуудаар хэлэлцэж, НИТХ-ын ээлжит бус XIII хуралдаанаар эцэслэн шийдвэрлэнэ.