Монгол Улсын Ерөнхийлөгч У.Хүрэлсүх үндэсний үйлдвэрлэгч “АПУ” ХК, тус компанийн “Натур-Агро”, “АПУ ложистик төв”, “АПУ Дэйри” ХХК-ийн сүүний үйлдвэр болон үндсэн үйлдвэрт өнөөдөр ажиллалаа. “Хүнсний хангамж-Аюулгүй байдал” үндэсний хөдөлгөөний хүрээнд хүнсний үйлдвэр, эрдэм шинжилгээ, судалгаа, сургалтын байгууллага, лабораториудын ажилтай танилцаж, салбарынхны өмнө тулгамдаж байгаа асуудлыг хэрхэн шийдвэрлэх, төр, засгаас үзүүлж болох дэмжлэг, туслалцааны талаар санал солилцлоо.
АПУ компанийн тухайд, 6 охин компанитай. 2000 гаруй ажилтантай. Дотоод, гадаадын 14 мянга гаруй хувьцаа эзэмшигчтэй. Согтууруулах ундаа, ус, ундаа, сүү, сүүн бүтээгдэхүүний нийт 344 нэр төрлийн бүтээгдэхүүн үйлдвэрлэж, дотоод болон гадаадын зах зээлд нийлүүлдэг. Жил бүр улсын төсөвт дунджаар 300 тэрбум гаруй төгрөгийн татвар төлдөг, үндэсний тэргүүлэгч үйлдвэр. Тус компани Ерөнхийлөгчийн дэвшүүлсэн “Эрүүл Монгол хүн” хөтөлбөрийг үйлдвэрлэлдээ чиглэл болгож, 34, 36 градустай согтууруулах ундаа үйлдвэрлэж эхэлснээ танилцууллаа.
Ер нь, Азийн орнууд бага градустай архины үйлдвэрлэлийг түлхүү дэмжсэн бодит жишээ олон. Архины зохистой хэрэглээг бий болгоход үндэсний үйлдвэрлэгчдийн санаачилга, манлайлал чухал. Юу хэрэглэх нь хүний сонголт ч гэлээ, иргэдийн ухамсрыг төлөвшүүлэх, соён гэгээрүүлэх, нөлөөлөх нь үйлдвэрлэгчийн болон төрийн үүрэг билээ.
Энэ мэт цаашид ч үндэсний томоохон үйлдвэрүүд архины зохистой хэрэглээг бий болгоход өөрсдийн оролцоог нэмэгдүүлж, согтууруулах ундааны хатуулгийг шат дараалан буулгах боломжтойг АПУ ХК үлгэрлэжээ.
