Үндэсний номын баярын 31 дэх удаагийн арга хэмжээ өнгөрсөн өдрүүдэд болж өнгөрлөө. Жил бүр зохион байгуулагддаг эл өдрийг Чингэлтэй дүүргийн 19 дүгээр хорооны хэмжээнд зохион байгууллаа.
Тус өдөрлөгийн үеэр олон арга хэмжээ зохион байгуулж, залуусын сонсох дуртай хайртай дуучид, жүжигчдийг ч авчирсан байв. Мөн “Ном уншихын гайхамшиг”, “Номтой нөхөрлөсний ашиг тус” гэсэн сэдвээр лекторууд илтгэл тавьж байсан нь залуусыг номонд дурлах сэтгэгдлийг улам ихээр төрүүлж байсан юм.
Түүнчлэн дүүргийн хэмжээнд иргэдийн чөлөөт цагийг зөв боловсон өнгөрүүлэх, номонд хандах хандлагыг эерэг болгох, хорооны иргэддээ оюуны хөрөнгө оруулалт хийж, ном унших сонирхлыг төрүүлэх зорилгоор “Номтой нөхөрлөе” аяныг зохион байгуулж байгаа юм. Энэ аянд Чингэлтэй дүүргийн 19 дүгээр хорооны ахмадууд идэвхтэй оролцож, хүүхэд, залууст монгол өв уламжлалаа сурталчлан таниулах, ном уншсанаар ямар ач холбогдолтой талаар ярилцаж, номын хандив өргөж байсан нь олон хүний талархалыг хүлээж байв.
Тус арга хэмжээг санаачилсан Чингэлтэй дүүргийн 19 дүгээр хорооны Засаг дарга бөгөөд Чингэлтэй дүүргийн Залуучуудын холбооны тэргүүн Л.Цэеэрэгзэн өөрийн зүгээс хорооны номын сандаа олон ном хандивлаж, номынхоо талаар танилцууллаа. Тэрбээр философич мэргэжилтэй бөгөөд гүн ухааны ном унших дуртай гэнэ.
Энэ үеэр шинэ болон сэдэвчилсэн номын үзэсгэлэн, урлагийн тоглолт боллоо. Мөн олны танил жүжигчид хүүхдүүдтэйгээ хамтдаа бүжиглэж флашмоб хийж байлаа.
