Хөдөлмөр нийгмийн хамгааллын яам, Нийслэлийн ЗДТГ, Нийслэлийн Гэр бүл, хүүхэд, залуучуудын хөгжлийн газар, Шинжлэх Ухаан технологийн их сургууль хамтран “Нийгмийн инноваци, түншлэл” үндэсний форумыг зохион байгууллаа.
Тус форумыг нийгмийн ажлын үүсэл, хөгжил, нийгмийн ажлын болон технологийн шинэчлэл, олон улсын жишигт нийцсэн нийгмийн инновацийг нийгмийн ажил үйлчилгээнд өргөн нэвтрүүлэх, нийгмийн ажилтны ёс зүй, харилцаа хандлага, оролцоо, манлайллыг бэхжүүлэх, нийслэлд ажиллаж буй нийгмийн ажилтнуудыг нэгтгэн, санал санаачилгыг дэмжих зорилготойгоор зохион байгууллаа.
1997-1998 оны хичээлийн жилээс эхлээд анхны бакалаврын зэрэгтэй нийгмийн ажилтан буюу нийгмийн халамж зүйчдийг бэлтгэж эхэлсэн байна. Харин өнөөдөр бол төрийн өмчийн болон хувийн хэвшлийн 18 их дээд сургуульд нийгмийн ажилтнуудыг бэлтгэж байгаа аж.
Энэ форумын үеэр Хүүхэд хамгааллын чиглэлээр ажиллаж байгаа нийгмийн ажилтнуудын талаар хэлэлцлээ.
Хүүхэд гэр бүлтэй хамгийн эхэнд ажилладаг хүмүүс бол нийгмийн ажилтан юм. Нийгмийн ажилтан нь хүчирхийлэл, дарамтад өртсөн болон өртөх эрсдэлтэй хүүхэд, эмэгтэйчүүдийн нөхцөл байдлын үнэлгээг хийж, тэдний аюулгүй байдлыг хангах, хамгаалал ба халамжийн үйлчилгээ үзүүлэх үүрэгтэй тухай тусгасан. Энэ утгаараа хамтарсан багийн нийгмийн ажилтан нь нийгмийн хамгаалал, халамжийн үйлчилгээ үзүүлэх хуулиар олгогдсон эрх бүхий цөөн мэргэжилтнүүдийн нэг юм. Хүүхэд хамгаалал, гэр бүлийн хүчирхийлэлтэй тэмцэх салбарт гарсан нэг ололт бол нийгмийн ажилтан бусад салбарын мэргэжилтнүүдтэй хамтран багаар ажиллах санаачлага гарч, энэ санаачлагыг хууль эрх зүй болон нийгмийн үйлчилгээний хүрээнд хүлээн зөвшөөрсөн явдал юм.
Хамтарсан багаар ажиллах нь хүүхэдтэй зүй бус харьцах явдалтай тэмцэхэд салбар дундын мэргэжилтнүүдийг оролцуулан, хүүхэд хамгааллын асуудлыг илүү өргөн хүрээтэй хэлэлцэж, нөхцөл байдлын үнэлгээг нарийвчлан хийх, нийгмийн үйлчилгээг чанартай хүргэх, байгууллагуудын болон мэргэжилтнүүдийн уялдаа холбоог хөгжүүлэхэд чухал нөлөө үзүүлж байгаа аж.
Хүүхэд хамгааллын чиглэлээр манай улсад 400 гаруй нийгмийн ажилтан ажиллаж байна.
Нийгмийн ажилтнуудын хувьд тулгамдсан хэд хэдэн асуудал байгаа юм. Тухайлбал, Хүчирхийлэлд өртсөн ба өртөх магадлалтай хүүхдэд Хүүхэд хамгааллын үйлчилгээг бүрэн гүйцэд, тогтвортой хүргэж чадахгүй байна. Мөн анхан шатанд ажиллах хүүхэд, гэр бүлийн нийгмийн ажилтангүй, хүний нөөц тогтворгүй байдаг зэрэг хэд хэдэн тулгамдсан асуудал байгаа талаар хэлэлцлээ.
