Өнгөрөгч Лхагва гарагийн Засгийн газрын хуралдаанаар Хөтөлийн цемент шохойн үйлдвэр ХК-ийн хувьчлалыг хүчингүй болгож, төрийн өмчид авах шийдвэр гаргасан.
Уг шийдвэрийн дагуу Төрийн өмчийн бодлого зохицуулалтын газраас өнөөдөр тус үйлдвэрт ажиллаж байна.
Төрийн өмчийн бодлого зохицуулалтын газрын Б.Цэнгэл “Засгийн газраас Хөтөлийн цемент шохой төрийн өмчит хувьцаат компанийн хувьчлалын талаар авах арга хэмжээний тогтоол батлагдан гарсантай холбогдуулан тус компанийн гүйцэтгэх удирдлагыг томилох хүртэл хугацаанд захирлын үүргийг түр орлон гүйцэтгэгчээр Л.Наранбаатарыг томилсон. Ажилчдын хувьд биднийг яах бол гэсэн айдасгүйгээр ажлаа үргэлжлүүлэх ёстой. Үйлдвэрийн үйл ажиллагаа хэвийн үргэлжилнэ” гэв.
Компанийн захирлын түр орлон гүйцэтгэгчээр томилогдсон Л.Наранбаатар “Амаргүй нөхцөл угтаж байна. Хөтөлийн цемент шохойн үйлдвэр эдийн засаг хүндэрсэн, Хөгжлийн банкны өрөө төлж чадахгүй байдалд оржээ. Бүтээн байгуулалтын улирал эхэлж буй энэ үед цементийн үнээ өсгөж. Сахал ажил хүлээлцэхгүй шүүхдэнэ гэнэ. Төр үнэгүй өгсөн өмчөө буцааж авах ажилд их л саад учрах бололтой…” хэмээн жиргэв.
Мөн “Хөтөлийн Цемент шохойн үйлдвэрээс тоног төхөөрөмж, техникүүдийг өчигдөрөөс зөөгөөд эхэлжээ. Нэгэн ажилтан нь энэхүү зургийг дарсанаа явууллаа. Одоогоор Эрдэнэбилэгийн талынхан ажил хүлээлцээгүй байсаар байна” гэжээ.
