УИХ-ын ээлжит бус чуулганы хуралдаан эхэллээ. Хуралдаанаар Монгол Улсын 2022 оны төсвийн тухай хуульд нэмэлт, өөрчлөлт оруулах тухай, Нийгмийн даатгалын сангийн 2022 оны төсвийн тухай хуульд өөрчлөлт оруулах тухай хуулийн анхны хэлэлцүүлгийг хийлээ.
УИХ-ын дарга Г.Занданшатар: Монгол Улсын Ерөнхийлөгч У.Хүрэлсүх тэтгэврийг нэмэгдүүлэх чиглэлээр тодорхой арга хэмжээ авахыг Засгийн газарт үүрэг болгосон. Ийнхүү төсөвт тодотгол хийн, хөрөнгө оруулалтын зардлаа танаж, тэтгэврийг нэмэгдүүлэх хуулийн төслийг өргөн барилаа. Бар жилийн босгон дээр тэтгэврийг нэмэгдүүлэх гэж байна. Усан бар жил шинэ сэргэлтийн жил байх болно. Цагаан сарын босгон дээр Монголын талд ногдох өрийг тэглэж, Дубайн гэрээг цуцлахаар шийдвэрлэлээ. Энэ мэт улсаа өөд татаж, иргэдээ өөд татах төр засгийн бодлого урагштай байгаад талархаж байна.
Ерөнхий сайд Л.Оюун-Эрдэнэ: Ерөнхийлөгчийн өгсөн чиглэл, Засгийн газрын мөрийн хөтөлбөрийг үндэслэн Монгол Улсын төсвийг тодотголыг УИХ-д өргөн барьж байна. Төсвийн тодотголын хүрээнд бүрэн тэтгэврийн доод хэмжээг 500 мянган төгрөг хүртэл өсгөж, 500 мянган төгрөгөөс дээш тэтгэврийн мөнгийг 15 хувиар нэмэгдүүлэх болон өргөн хэрэглээний бараа бүтээгдэхүүний үнийг тогтворжуулахтай холбогдуулан зарим багц арга хэмжээг тусгалаа.
Улсын төсвийн зардлуудыг танах, зураг төсөл нь тодорхойгүй болон төсвийн хэлэлцүүлгийг явцад шинээр нэмэгдсэн зарим төсвийг хасах зэргээр шаардагдах эх үүсвэрийг тооцлоо. Ингэснээр 2022 оны төсвийн нийт зардал нэмэгдэхгүй, орлого буурахгүй.
УИХ-ын гишүүн С.Бямбацогт: Тэтгэврийг нэмэхэд бодож байж, тооцоо судалгаа хийж байж алгуурхан нэмэх байсан юм болов уу. Арай огцомдчихсон юм болов уу гэж бодож байна. Тэтгэврийн огцом нэмэгдүүлэх нь цаашдаа цалин нэмэх, халамж нэмэх асуудал болно. Ийнхүү үнийн өсөлтийг ташуурдана. Бид бараа бүтээгдэхүүний үнийн өсөлтийг хэрхэн барих вэ. Гэтэл одоо эрэлтийг дэмжсэн цалин тэтгэврийн инфляци үнийг илүү хөөрөгдөнө. Валютын ханшийг хэрхэн тогтвортой байлгах юм зэрэг олон асуудал тэтгэврийн нэмэгдэлтэй холбоотой гарч ирнэ.
