Онцгой байдлын алба хаагч албан үүргээ гүйцэтгэж яваад цахилгаанд цохиулж зуурдаар нас барсан билээ. Талийгаачийнх эхнэр Ж.Одгэрэл хэвлэлийнхэнд хандаж, Баянзүрх дүүргийн Цагдаагийн III хэлтсийн гадна өлсгөлөн зарлаж байна.
Тэрбээр “Манай нөхөр энэ сарын 3-ны өдөр ээлжнээсээ буугаад харих ёстой байтал дарга нар нь түүнийг зараалд явуулснаас болж амиа алдсан. Хурган дарга нарын зараалд явж, ажлын бус цагаараа нөхөр минь өөд болсон. Энэ асуудалд удирдлагууд нь 100 хувь буруутай. Би өнгөрөгч баасан гаригт камерын бичлэг үзсэн. Бичлэгээс харахад аюулгүй байдал алдагдаж, нөхөр минь тогонд цохиулж нас барсан.
24 цагийн жижүүрийн ажлаасаа буугаад харих гэж байхад нь Улиастай руу явуулж, самбар солих ажил даалгасан. Тухайн үед мэргэжлийн бус жолоочтой хамт явсан байсан. Шатыг доош буулгах ёстой байтал туршлагагүйн улмаас дээш өргөж, манай нөхөр тогонд хүчтэй цохиулж, газар дээрээ өөд болсон байсан. Тогонд цохиулахаас 13 минутын өмнө надтай утсаар ярихад “Одоо харилаа” гэж байсан. Гэтэл нөхөр минь өөд болсноос хойш гурван цагийн дараа “Танай нөхөр өөрийн буруугаас болж тогонд цохиулаад нас барлаа” гэж мэдэгдсэн. Танай нөхөр хөлстэй явж байгаад малгайгаа тайлж, тогтой утсанд хүрсэн гэж тайлбарлаж байгаа юм.
Харин миний үзсэн бичлэгт 100 хувь бусдаас хамааралтай осол байсан. Тиймээс энэ бичлэгийг олон нийтэд танилцуулж, нөхрийн минь нэр хүндийг сэргээхийг шаардаж байна. Тэр бичлэгийг олон нийтэд үзүүлтэл өлсгөлөн зарлана. Тийм байхад дарга нар нь танай хүний буруутай үйлдэл гэж хайцаалж нуугаад өнгөрөх гэж байгааг хэрхэвч тэвчихгүй.
Надад талийгаачийн амь даатгал, мөнгө төгрөг огтхон ч хэрэггүй. Гагцхүү надад хань минь яагаад амиа алдсан бэ гэдэг үнэн л хэрэгтэй байна. Монгол Улсын Ерөнхийлөгчөөс авсан “Шударга журам” медалийг нь би гэдсэнд байгаа хүүхдэдээ өгнө гээд хувцсыг нь өгөөгүй.
Гэтэл наад төмрөө ав гэж над руу шидэж байгаа юм. Цагдаагийн дарга нар үгсэн хуйвалдаж камерын бичлэгийг нууж байгаа. Нөхөр маань нэг өдөр ажилдаа гарч, гурван хоног амрах ёстой. Гэвч дарга, цэрэг нарын хувийн ажилд зарагдаад гурван хоног ч амарч чаддаггүй байсан. Тэр өдөр ч гэсэн ажлаас буучихсан мөртлөө албан үүрэгт нь байхгүй ажил гүйцэтгэж яваад амиа алдсан” хэмээлээ.
