ХӨСҮТ-ийн захирал Л.Баттөр сүүлийн өдрүүдэд бүртгэх тохиолдлын тоо нэмэгдэх болсонтой холбоотой мэдээлэл өглөө.
Тэрбээр “Аливаа хөл хорио тогтоосны дараа хүн амын дундах хөдөлгөөн нэмэгддэг. Энэ зүй тогтлоор нууц хугацааны 5.5 хоногийн дараагаас эхлэн тохиолдлын тоо нэмэгдэх чиг хандлага байдаг. Бүх нийтийн бэлэн байдлын зэрэгт шилжиж, хөл хорионы зэрэглэлийг бууруулсантай холбоотой, мөн энэ сарын 22-наас эхлэн орон нутгийн зорчих хөдөлгөөнийг нээсэн, Ерөнхийлөгчийн сонгуультай холбоотой хөл хөдөлгөөн нэлээн нэмэгдсэн. Үүний дагуу өдөрт бүртгэгдэх тохиолдлын тоо нэмэгдэж эхэлж байна.
Хамгийн оргил үеийн тархалтаас хойш нас баралт, хүндрэл нэмэгддэг. Хатуу хөл хорионы үр дүнд тархалтын тохиолдлын тоо буурч, үүнийг дагаж 14-21 хоногийн дараа нас баралтын тоо буурна гэсэн тооцоолол хийж байсан. Үүнхий дагуу нас баралт харьцангуй буурч байна. Гэхдээ эргээд давалгаа үүсэх хандлагатай. Энэ давалгаа олон хүнийг хамарвал вакцинжуулалт үр дүнгүй болох, эргээд нас баралтын тоо нэмэгдэх эрсдэл хүлээж байна.
Батлагдсан тохиолдлын ойрын хавьтлуудын шинжилгээг дүүрэг, хорооны түвшинд зохион байгуулж байна. Үүнд 80-90 хувийн хамрагдалтай шинжилгээ хийж байна. Гэхдээ вакцинжуулалтын бүрэн тунд хамрагдаад бүрэн хамгаалагдсан гэх байдлаар хандсан тохиолдол бий.
Иргэд вакцинжуулалтдаа бүрэн хамрагдах байдал сайн байна. Нийслэлийн иргэдийн 99 хувь нь эхний тундаа хамрагдлаа. Мэдээж эсрэг заалттай, эсвэл эргэлзсэн байдлаас болж дархлаажуулалтад хамрагдаагүй иргэд бий. Тэд вакцинжуулалтдаа хамрагдвал тохиолдлын тоо буурах боломжтой гэж харж байна.
Дархлаажуулалтын эхний тундаа хамрагдсан иргэдийн 0.5 хувь нь эргэж өвдсөн. Тодруулбал, 9000 орчим хүн халдвар авсан гэсэн үг.
Хоёр дахь тунгаа хийлгэсэн иргэд ч мөн халдварт өртөх эрсдэлтэй. Бүрэн тундаа хамрагдсан 3000 гаруй иргэн халдвар авсан тохиолдол гарсан. Хоёр дахь тундаа хамрагдаад 14 хоногоос дээш хугацааны дараа халдвар авсан иргэддээ онцгой анхаарах шаардлага бий. Өөрөөр хэлбэл, бүрэн тундаа хамрагдаад 14 хонож байхад дархлаа тогтохгүй байгаа шалтгаан нөхцөлийг судлах ёстой. Бүрэн тундаа хамрагдаад 14 хоног өнгөрчихөөд халдвар авсан 900 гаруй хүн бий. Бүрэн тундаа хамрагдсан 5 хүн нас барсан” гэлээ.
