Цар тахлаас урьдчилан сэргийлэх зорилгоор Засгийн газар, Улсын онцгой комиссын шийдвэрийн дагуу хилийн боомтын зорчих хөдөлгөөнийг тодорхой хугацаанд хязгаарласан.
Энэ хугацаанд гадаадад гацсан монгол иргэдийг эх оронд нь авчрах, хилээр нэвтрүүлэх ажлыг амжилттай зохион байгуулсан бөгөөд яаралтай нутаг буцах хүсэлтэй байсан бүх иргэнээ эх оронд нь ирүүлсэн талаар Консулын газрын захирал Л.Мөнхтүшиг онцоллоо.
Мөн тэрбээр иргэдээс ирүүлсэн асуултад хариулт өгсөн юм.
-Манай улсын иргэд гадаад руу зорчиход ямар шаардлага тавьж байгаа вэ. Заавал вакцин хийлгэсэн байх шаардлагатай юу?
-Янз бүрийн шаардлага тавьж байгаа. Гэхдээ албан ёсоор 2 тун хийлгэсэн гадаадын иргэдийг зөвхөн нэвтрүүлнэ гэсэн хатуу шаардлага тавьсан улс орон алга. Иргэдийн дунд ямар вакцин хийлгэснээс хамаарч давуу эрх эдэлнэ гэх ташаа ойлголт түгээмэл байна. Ийм зүйл байхгүй. Дэлхийн улс орнууд дархлаажуулалтын 1, 2-р тунд хамрагдсанаа нотлох баримт бичгийг олгож эхэлсэн. Манай улсын хувьд ч гэсэн ийм гэрчилгээг олгоход бэлэн болсон. Гол нь энэ гэрчилгээг гадаадын улс орнууд хүлээн зөвшөөрснөөр тухайн иргэнийг чөлөөтэй нэвтрүүлэх, нэвтрүүлсэн тохиолдолд тусгаарлахгүй байх яриа хэлэлцээр Гадаад харилцааны яам хийж байна. Е mongolia-гаас иргэд дархлаажуулалтад хамрагдсан гэрчилгээгээ авч болж байгаа. Хэрэв гадаад зорчих хүсэлтэй иргэд байвал тухай улсын визийн эрх тусдаа. Өнөөдөр дэлхий 117 улс хилээ бүрэн болон хэсэгчлэн хаачихсан байна. Вакцины гэрчилгээтэй бол шууд гадаад явчихна гэж эндүүрээд байна.
