QR код олгох асуудлаар ажлын хэсгийн ахлагч Х.Нямбаатар Нийслэлийн шуурхай штабын байранд мэдээлэл хийлээ.
Хууль зүй, дотоод хэргийн сайд Х.Нямбаатар: Бүх нийтийн бэлэн байдлын зэрэгт шилжсэнтэй холбоотойгоор хөдөлгөөнийг илүү хязгаарлах, вакцинжуулалтыг эрчимүүлэхээр төлөвлөж байна. Монгол Улсад нийлүүлэгдэх вакцин хуваарийн дагуу нийлүүлэгдэж эхэлсэн. Иймээс нийслэл болон орон нутагт вакцинжуулалтыг эрчимжүүлнэ.
Улаанбаатарт ирэх 12 хоногийн хугацаанд зөвшөөрөгдсөн байгууллагуудын тээврийн хэрэгслүүдийг QR кодоор явуулах түр журмын төслийг төслийг танилцуулаж байна. Журмыг хэрэгжүүлж эхэлснээр 45.300 тээврийн хэрэгсэл замын хөдөлгөөнд оролцохоор шивэлт хийгдлээ. Төрийн тусгай чиг үүрэгтэй байгууллагууд үйл ажиллагаагаа явуулах үүднээс тус байгууллагын албан хаагчид замын хөдөлгөөнд оролцоно.
Төрийн захиргааны байгууллагуудын албан хаагчдыг ирэх 14 хоногийн хугацаанд тэг зогсолт хийх хэмжээнд хөдөлгөөнийг хязгаарлах шийдвэр гаргасан. Өөрөөр хэлбэл, төрийн болон орон нутгийн захиргааны байгууллагууд, төрийн болон орон нутгийн өмчит улсын үйлдвэрийн газруудын үйл ажиллагааг хамгийн бага түвшинд нь зогсолт хийнэ. Нэн шаардлагатай тохиолдолд тухайн салбарын сайд эсвэл Нийслэлийн Засаг даргын тодорхойлолтоор тухайн байгууллагын замын хөдөлгөөнд оролцох байгууллагын тээврийн хэрэгслийн зөвшөөрлийг олгох журам боловсруулсан. УОК-т энэ саналаа өгнө. УОК 18.00 цагаас хуралдаж, энэ журмыг хэлэлцэн, эцэслэнэ.
Зөвшөөрөгдсөн байгууллагууд өмнө нь системд бүртгүүлж, QR код авч байсан бол дахин хүсэлт илгээхэд шинээр QR код илгээгдэж, хөдөлгөөнд оролцох боломжтой.
Хүнсний дэлгүүр, бөөний төвүүдтэй холбоотой QR кодын хүсэлт ихээр ирдэг. Мэдээллийн системд зохион байгуулалт нэлээн сайн хийсэн. 8 нэрийн барааны дэлгүүр 2-3 зөвшөөрөл авсан тохиолдол гарсан. Дахин ингэж олгох боломжгүй.
QR кодыг авахдаа UB smart руу нэвтэрч, хүсэлтээ илгээнэ. Ингэхдээ QR код 3 янз байгаа. Эхнийх нь нэг удаагийнх буюу газар тариалан, орон нутаг руу зорчихтой холбоотой.
Дараагийнх нь зайлшгүй ажиллах шаардлагатай төрийн албан хаагчдад олгох. Энэ нь цагийн хуваарьтай. Өглөө ажилдаа ирэх, орой тарах цагийн хуваарийн дагуу.
Хэрэв QR кодыг бусдад дамжуулах, эсвэл хэн нэгэн дураараа авах боломжгүй. Хэрэв бусдад дамжуулсан байвал Замын цагдаа тухайн QR кодыг шууд хүчингүй болгох эрхтэй. Мөн QR кодтой ч ажлын үнэмлэхийг заавал биедээ авч явна.
Ажлын үнэмлэх, тодорхойлолтоор, тэгш сондгойгоор тээврийн хэрэгслийг хөдөлгөөнд оролцуулсанаар 110.000 гаруй тээврийн хэрэгсэл өдөрт хөдөлгөөнд оролцож байсан.
