Эрүүл мэндийн яамны газрын дарга Л.Энхсайхан: Халдварын тохиолдол нэмэгдэхийн хэрээр хатуу хөл хориог тогтооох, иргэд халдвар хамгааллын дэглэмийг сайтар мөрдөх нь чухал.
Иргэд ажлын байран дээрээ үдийн цайгаа уухдаа амны хаалтаа авч өөдөөсөө харж суух, хоорондоо харилцах явдал их гарч байна. Хэдийгээр хатуу хөл хорио тогтоосон ч гадуур сэлгүүцэх, найз нөхдөөрөө уулзах тохиолдол төдийлөн буурахгүй байгаа нь халдварын тохиолдлын тоог нэмэгдүүлж байна.
Цахим орчинд эрүүл мэндийн салбарынхан руу ихээр дайралт явагдах боллоо. Энэ нь өдөр шөнийг үл харгалзан бүхий л чадлаараа ажиллаж байгаа эмч, эмнэлгийн ажилчдын сэтгэл зүйд сөргөөр нөлөөлж байна. Иймээс аль болох бодит эх сурвалжтай, албаны мэдээллийг авч байхыг хүсье.
Орон нутагт эрүүл мэндийн төвүүд болон хувийн эмнэлгүүдтэй хамтран ор дэлгэх ажиллагааг эрчимжүүлж эхэлсэн. Орыг хэдээр ч, хэдийд ч дэлгэж болж байна. Гагцхүү ажиллах боловсон хүчний дутагдал байгааг ойлгох хэрэгтэй.
Улсын хэмжээнд халдвартай нь батлагдсан 0-17 насны 4412 байна. Нийт батлагдсан тохиолдлын 22 хувийг хүүхэд эзэлж байна. Одоогоор хүндэрсэн, нас барсан тохиолдол байхгүй. Гэхдээ хүүхэд хүндрэх эрсдэл бий. Тэд вакцины хийлгээгүй байгаа. Мөн ядрах, үс унах тохиолдол бүртгэгдэж байгаа.
