Бүх нийтийн бэлэн байдлын зэрэгт шилжсэн хугацаа энэ сарын 23-нд буюу ирэх мягмар гарагийн 06.00 цагт дуусгавар болно. Хатуу хөл хорио тавигдаж, үйлдвэр, үйлчилгээний газруудыг нээхээр УОК комисс ажиллаж байна. Тодруулбал, “Ковид-19” цар тахлын үед иргэд, аж ахуйн нэгжүүдийн үйл ажиллагааг хэвийн үргэлжлүүлэхийн тулд халдварын голомт, эрсдэлийн нөхцөл байдалтай уялдуулан зохион байгуулах “Түр журам” боловсруулах ажлын хэсгийг Шадар сайд С.Амарсайхан байгуулсан юм.
Ажлын хэсгийн ээлжит хурал өнөөдөр болж, журмын төслийн явцыг хэлэлцлээ. Түр журмыг Засгийн газрын хуралдаанаар эцэслэн шийдвэрлэж, энэ сарын 23-наас эхлэн дагаж мөрдөх юм.
Дагаж мөрдөх журамд кино театр, бассейн, фитнессийн байгууллагууд хэрхэн ажиллах, халдвар хамгааллын дэглэмийг мөрдүүлэх талаар тодорхой заах юм. Тухайлбал, кино театр, фитнессүүд 40-50 хувийн дүүргэлттэйгээр үйл ажиллагаа явуулж эхлүүлэхийг зөвшөөрөх гэнэ.
Нэг өдөр бүх байгууллагын үйл ажиллагааг нээхгүй бөгөөд дэс дараалалтай арга хэмжээ авч ажиллуулна гэдгийг Засгийн газрын Хэвлэл мэдээллийн албанаас мэдэгдэж байсан юм.
