Улсын онцгой комиссын хэвлэлийн төлөөлөгч Ц.Ганзориг хүнсний зах, худалдаа, бөөний төвүүдийг нээх талаар мэдээллийг өглөө.
Тэрээр “Энэ сарын 16-ны өдрөөс хүнсний томоохон зах, худалдааны төвүүдийг нээхээр болсон. Засгийн газрын тогтоолоор хөл хорионы үед 14 салбарын үйл ажиллагааг зөвшөөрсөн. Хөл хорионы 12 хоногийн хугацаанд хүнсний хомсдол үүсгэхгүйн тулд хүнсний бөөний төв, захуудыг шат дараалалтай нээхээр төлөвлөсөн.
Нэг үгээр хэлбэл, хөл хорионы 12 хоногийн хугацаанд хүнсний дэлгүүрүүдийн лангуу хоосорч, хомсдол бий болохоос сэргийлж хүнсний үйлдвэрүүдийг нээхээр шийдвэрлэжээ.
Түгээлтийн аж ахуй нэгж байгууллагууд хүнсний бараа бүтээгдэхүүнээ татаад хүнсний дэлгүүрүүдэд түгээх учир бөөний төв, захаар иргэд үйлчлүүлэх боломжгүй. Хоёрдугаар сарын 16-н гэхэд дараах 24 бөөний төв нээгдэх ба цаашид 18, 20, 23-наас гэсэн шатлалаар 49 хүнсний бөөний төв нээгдэнэ. Хүнсний үйлдвэрлэлийн 597 үйлдвэр, түгээлтийн 287 ААН нээгдэх ба тэдгээрийн 10-15 хувийн квот бүхий ажилчид болох нийт 26 мянга орчим хүн ажиллаж, 9000 гаруй тээврийн хэрэгсэл хөдөлгөөнд оролцоно.
Иргэд хүнсний бөөний төвүүдэд очиж хүнсээ авахгүй зөвхөн гэрийнхээ ойр дэлгүүрээр үйлчлүүлнэ. Харин дээрх захуудаас хүнсний дэлгүүрүүд худалдан авалт хийх аж.
