Дархан-Уул аймагт гэрийн тусгаарлалтанд байсан нэг гэр бүлийн 2 иргэнээс коронавирус илэрсэн байна. Тус халдвар илэрсэн хоёр иргэнийг Улаанбаатар хот руу явуулах ажлыг зохион байгуулахаар бэлдэж буй аж.
“Аймаг руу нэвтэрч буй хүмүүсээс түргэвчилсэн шинжилгээг авч, гэрийн тусгаарлалтад байлгаж байгаа. Халдвар авсан хоёр иргэн гэрээсээ огт гараагүй. Халдварын дэглэмийг маш сайн мөрдсөн байсан. Хагалгаанд орсон иргэн байсан учир эрүүл мэндийн байгууллагын хоёр ажилтан гэрт нь очиж боолт хийсэн.
Халдвар илэрсэн иргэдийн ойрын хавьтлын найман иргэнийг тусгаарласан. Иргэд халдвар хамгааллын дэглэмээ сайн хэрэгжүүлсэн нь бидний ажилд дөхөм болж байна.
Тухайн хоёр иргэн нь гэр бүлийн хоёр иргэн бөгөөд нэг нь Амгалан амаржих газарт хэвтэн эмчлүүлээд энэ сарын 7-ны өдөр Дарханд ирсэн байна. Тэдний долоо дахь хоногийн давтан шинжилгээнээс коронавирусийн халдвар илэрсэн талаар Дархан-Уул аймгийн онцгой комиссоос мэдээллээ.
Үүнтэй уялдуулан дараах шийдвэрүүдийг гаргажээ. Үүнд;
-АОК өмнөх хуралдааны шийдвэр хэвийн мөрдөгдөнө.
-ААНБ-уудын үйл ажиллагаа хэвийн явагдана.
-Дархан дотор ямар нэг хөдөлгөөний хорио байхгүй
-18 хүртэлх насны хүүхдүүдэд үйлчилгээний байгууллага үйлчлэхгүй.
-Сар шинийн золголт гэр бүлийн хүрээнд хийж дууссан тул маргаашнаас золголт хийгдэхгүй
Хяналтын баг ажиллаж хариуцлагын арга хэмжээ авч ажиллана.
