tsenzuurmn
2000 оны эхээр Монголын дуу хөгжмийн салбарт шинэчлэл хийн Сак, My love, Sorrow зэрэг дуунуудаар анхны лебел артистаа танилцуулж байсан “New star” хөгжмийн студийн 20 жилийн ой энэ онд тохиож буй.
Тус студи нь орчин цагийн хөгжмийг өнөөгийн мэргэжлийн түвшинд авчрахад томоохон хувь нэмрээ оруулсан хэмээн салбарынхандаа тодорхойлогддог бөгөөд дуу, кино, жүжгийн урлагийн уран бүтээлчидтэй хамтран ажиллаж, олон зуун дуунуудын аялгуу, хөгжмийн найруулгыг хийсээр ирсэн. Тиймдээ ч студийн 20 жилийн ойдоо зориулан тус студиэс төрөн гарсан Сар шиг хол нутаг, Үзэсгэлэнт минь, Буруу эргэлт киноны дуу, Илчилж амжаагүй хайр, Хагацал үзээгүй хайр, зэрэг 40 гаруй хит дууг сонгож, бүх одод чуулсан томоохон тоглолтыг зохион байгуулахаар товоо зарлажээ.
Тоглолт 2024 оны аравдугаар сарын 18-нд “UG Arena” спорт цогцолборт болох бөгөөд уг тоглолтод 20 хамтлаг, дуучин оролцох юм.
Энэ үеэр дуучин Э.Энх-Эрдэнэ “My love” дууг кантри стилээр, дуучин Д.Оюу “My Vision”-ыг Жэйсон, А.Хишигдалай нар “Нууц амраг чинь болъё” жүжгийн дуу “Илчилж амжаагүй хайр”-ыг, Д.Зоригт “Өвлийн дуу”-г, И.Мишээл “Sweet girl”-ыг шинэчилсэн найруулгаар дуулж, сонсогчдын хүртээл болгох гэнэ.
“Пентатоник” академийн дээд шагналт, шилдэг хөгжмийн найруулга, кино жүжгийн дууны шагналт “New Star” хөгжмийн студи нь продюсеринг, ая зохиох, лэйбел, хоолой бичлэг, аранжировк, миксинг мастеринг, томоохон шоу тоглолтын зохион байгуулалтын үйл ажиллагаа явуулдаг мэргэжлийн студи юм. Дашрамд сонирхуулахад, тус студийг “Айзам 2” хамтлагийн гитарчин, хөгжмийн зохиолч, оранжировшик С.Гантөр гэргий Л.Энхмандахын хамт үүсгэн байгуулсныг уншигчид мэдэх биз.
“New Star” студи байгуулагдсан цагаасаа хойш өнөөдрийг хүртэл 20 гаруй томоохон тоглолт зохион байгуулжээ.
0 cэтгэгдэлтэй