Улсын бүртгэлийн ерөнхий газраас цаг үеийн асуудлаар мэдээлэл өглөө.

Улсын бүртгэлийн ерөнхий газрын Иргэний улсын бүртгэлийн газрын дарга Т.Нармандах “Нийгмийн сүлжээнд өрнөж буй үйл явдалтай холбоотойгоор мэдээлэл хийе. Улсын бүртгэлийн байгууллагын мэдээллийн сангаас мэдээлэл устгах боломжгүй. Тухайн иргэнтэй холбоотой түүх Цахим мэдээллийн сан, Иргэний бүртгэлийн архивт хадгалагддаг. Иймээс хувийн мэдээлэл Улсын бүртгэлийн сангаас устгагдах боломжгүй гэдгийг албан ёсоор хэлье. Улсын бүртгэлийн сан төрийн тусгай байгууллагын хяналтад үйл ажиллагаа явуулдаг.

Жилд 16 мянга орчим гэрлэлт бүртгэдэг.  Харин гэрлэлт дуусгавар болсон бүртгэл 4000 орчим хийгддэг.

Мэдээллийг нь өөрчилсөн гэх Т.Ганболд, Х.Янжингаажид нартай холбоотой мэдээлэл өгөхөд бага зэрэг түвэгтэй байна. Учир нь эдгээр иргэдийн мэдээлэл хязгаартай бүлэгт хамаарагддаг. Гэхдээ цахим орчинд Улсын бүртгэлийн байгууллагыг буруутгасан, ташаа мэдээлэл яваад байгаа учир товч мэдээлэл өгөх нь зүй гэж үзсэн.

Тэд 2017 онд гэрлэлтээ бүртгүүлсэн байна. Гэвч иргэн Т.Ганболд гэрлэлтээ хууль бус гэх үндэслэлээр манай байгууллагад гомдол гаргасан. Ингэхдээ “Би хэзээ ч өөрийн биеэр гэрлэлт бүртгүүлж байгаагүй” гэж мэдүүлсэн. Энэ гомдлын дагуу улсын байцаагчийн дүгнэлт гарч, гэрлэлтийг хүчингүй болгосон. Манайх тус гэрлэлтийг хууль бус, хүчин төгөлдөр биш гэж үзсэн” гэв.

Баримт бичиг зөрүүтэй, зөрчилтэй, хуулийн шаардлагыг хангаагүй гээд сонсох ажиллагаа явуулсны дагуу холбогдох шийдвэр гарсан” гэлээ.