Монгол Улсын Их хурлын даргын 2021 оны 80 дугаар захирамжаар “Хөдөө аж ахуйн гаралтай бараа, түүхий эдийн биржийн тухай” хуулийн шинэчилсэн найруулгын төсөл боловсруулах чиг үүрэг бүхий Ажлын хэсгийг УИХ-ын гишүүн Ж.Бат-Эрдэнээр ахлуулан байгуулсан.
Тус ажлын хэсгийн ажлын хүрээнд Бүгд Найрамдах Турк Улсын Хөдөө аж ахуйн биржүүдтэй танилцаж, туршлага судлахаар холбоо тогтоосны дагуу 2022 оны 11 дүгээр сарын 20-ний өдрөөс 2022 оны 11 дүгээр сарын 27-ны өдрүүдэд албан томилолтоор ажилласан билээ.
Энэ үеэр Бүгд Найрамдах Турк Улсын 131 жилийн түүхтэй тус улсын хамгийн анхны Хөдөө аж ахуйн бирж болох Измирийн Хөдөө аж ахуйн биржийн үйл ажиллагаа, хууль эрх зүйн орчин, “open outcry” хэлбэрээр арилжаа хийгддэг арилжааны танхим зэрэгтэй Хөдөө аж ахуйн биржийн төлөөлөгчид танилцав.
Мөн тус хотын Селчук тосгонд байрлах “ELİDAŞ” хөвөнгийн итгэмжлэгдсэн агуулах, “İzladaş” лаборатори болон Efkar мал төхөөрөх үйлдвэрийн үйл ажиллагаатай танилцаж туршлага солилцсон юм.
Туркийн Худалдааны бирж (TЬRİB)-ийн тухай
Туркийн Худалдааны бирж нь анх 2018 оны 6 дугаар сарын 8-ны өдөр үүсгэн байгуулагдаж, 2019 оны 7 дугаар сарын 26-ны өдрөөс үйл ажиллагаагаа эхэлсэн бөгөөд итгэмжлэгдсэн агуулахад байршуулсан бараа, түүхий эдийг гэрчлэх агуулахын бичиг (ELUS цахим гэрчилгээ) болон фьючерсийн арилжааг нэвтрүүлэх, цахим хөдөө аж ахуйг хөгжүүлэх зэрэг үндсэн чиг үүрэгтэйгээр үйл ажиллагаа эрхэлдэг.
Туркийн Худалдааны бирж нь итгэмжлэгдсэн агуулахууд, Туркийн Танхимууд болон Биржүүдийн холбоо (TOBB), Бүгд Найрамдах Турк Улсын Худалдааны яам, Бүгд Найрамдах Турк Улсын Хөдөө аж ахуйн яам, Бүгд Найрамдах Турк Улсын Эрдэнэсийн сан, Бүгд Найрамдах Турк Улсын Сангийн Яам болон бусад холбогдох байгууллагуудтай хамтран ажилладаг байна.
