Ерөнхий сайд Л.Оюун-Эрдэнэ: Манай экспорт нүүрс, зэс, төмрийн хүдрийн худалдаан дээр тогтдог. Хэн эдгээрт хяналтаа тогтооно, тэр хүн төрийг худалдан авах эрсдэлтэй. “ЭТТ” ХК-ийг байгуулснаас хойш олон үйл явдал өрнөсөн.
Нүүрстэй холбоотой нарийн мэдээллийг хэвлэл мэдээллийн хэрэгслээр ярьж, юу ч биш болгон өнгөрөөх сонирхол байна. Өчигдөр болсон жагсаалд олон хүн энэ асуудлаар байр сууриа илэрхийлсэн. Бид “Оюутолгой”, “Эрдэнэт”, Дарханы төмөрлөгийн үйлдвэрт гарсан асуудлыг шийдсэн шиг “ЭТТ”-д үүссэн нөхцөлийг ч мөн шийдэж чадна.
Би Засгийн газрын тэргүүний хувиар энэ хэргийн талаар илүү дэлгэрэнгүй ярилцах боломжгүй байна. Олон нийт энэ асуудалд биднийг дэмжиж байгаад би талархаж байна. Энэ хэрэг нэгэнт олон нийтийн анхаарлын төвд орсон тул бид шийдэж чадах юм байна гэсэн итгэл надад төрсөн.
Жагсаалыг нүүрсний хулгайчид өөр зүйл рүү эргүүлэх гэж оролдсон. Эрдэнэс Тавантолгойн хуучин удирдлага болон тэдний удирдлагад ажиллаж байсан МОХ-ны удирдлагууд энэ жагсаалыг эргүүлэх гэж оролдсон. Тэдний амь нь тасрах гэж байна. Би тэмцлээсээ сөөм ч ухрахгүй.
УИХ ард түмний жижиг парламент байх ёстой. Парламент ард түмний жинхэнэ төлөөллөөс бүрдэх, илүү хүлээн зөвшөөрөгдөх, бага ард түмний үүргээ биелүүлэх, насны бүлгийг, нийгмийн давхаргыг, үндэсний цөөнхийг төлөөлөх учиртай. Энэ үүднээс харвал манай парламент энэ босгыг давахгүй байна.
Энэ байдал удаан үргэлжлэхээр парламент иргэдээс холдож, иргэд парламент биднийг төлөөлөхгүй байна хэмээн бухимддаг.
Иргэд гудамжинд дуу хоолойгоо өргөх биш тэр хүний төлөөлөл парламентад төлөөлөл нь байж ажилладаг тогтолцоо руу бид явах цаг боллоо. Хоёр удаа жагсаал болов. Эдийн засгийн өсөлт -4.3 хувь болсон үед иргэд бухимдах нь аргагүй. Би үүнийг ойлгосон.
Өчигдөр болсон жагсаалын дараа би манай парламентын засаглалд, Монгол Улсын нэр хүндэд эрсдэл үүсэж болзошгүй юм байна гэдгийг ойлгов. Бид жагсаалд гал унтраах байдлаар хандаж болохгүй. Мөсөн уулын орой л ил харагддаг. Бид цухуйсан хэсэгт л анхаарлаа хандуулбал урт хугацаандаа алдана.
