Монгол Улсын хэмжээнд 181 хүүхэд харах төв үйл ажиллагаа явуулж 2184 хүүхэд хамрагддаг гэсэн судалгаа байдаг. Хүүхэд харах үйлчилгээ нь стандартаар таван хүүхэд нэг хүүхэд харагчтай байхаар тогтоосон. Мөн нэг үйлчилгээний төв 15-аас ихгүй хүүхэд харах стандарт баталсан байдаг. Хүүхэд харах үйлчилгээтэй холбоотой зардлыг төр хариуцдаг. Нэг хүүхдийн хувьсах зардалд 149 мянган төгрөгийг төрөөс олгож байгаа юм байна.
Тэгвэл Нийслэлийн дүүргүүдийн нутаг дэвсгэрт үйл ажиллагаа явуулдаг хүүхэд харагчдын эрхэлж буй үйл ажиллагаа нь холбогдох эрх зүйн бичиг баримтад тавигддаг шаардлагыг хангаж буй эсэхэд хяналт шалгалт хийж, шаардлагатай зөвлөмж, арга зүй өгөх зорилгоор Нийслэл, дүүргийн Гэр бүл, хүүхэд, залуучуудын хөгжлийн газар, дүүргүүдийн хэлтсийн холбогдох албан хаагчдаас бүрдсэн ажлын хэсгүүд 7 дүүрэгт ажиллаж байна.
