Хүйтэн чингэлэгт бага насны хоёр хүүхэд харгалзах хүнгүйгээр уйлсан, даарсан байдалтай байсан талаар нэгэн иргэн цахим хуудсандаа бичжээ. Зургийн тайлбарт ээж нь архидан согтуураад хүүхдүүдийг орхиод явчихдаг тухай дурдсан байв.
Энэ талаар Гэр бүл хүүхэд залуучуудын хөгжлийн газраас “Сүхбаатар дүүргийн 9-р хороонд байрлах ТҮЦ-т ээж нь ажилладаг.
Аав нь орон нутгаар ажлаар явж байгаа. Хүүхдүүдийн ээж ажилтай үедээ тэднийг эмээ, өвөөд нь үлдээдэг. Тухайн өдөр өвөөгийнх нь бие өвдсөн тул хүүхдүүдээ ТҮЦ-тээ авч ирсэн. Гадаа гарч бие засаад орж ирэх хооронд тухайн иргэн хүүхдүүдийн зургийг авч цахимд нийтэлсэн байна. Энэ үйлдэлдээ иргэн хүүхдийн ээжээс уучлалт гуйсан. Хүүхдүүдийн биед хүчирхийллийн шарх, сорви байгаагүй. Биеийн байдал хэвийн байна” гэж мэдээллээ.
Хэрэв хүүхэд хараа хяналтгүй орхигдсон, тэдний эрүүл мэнд, амь насанд аюултай байдал үүссэн байвал иргэд цахим хуудсанд зураг, бичлэг нийтлэхээс илүүтэй Хүүхдийн тусламжийн 108 утсанд дуудлага өгөхийг Гэр бүл хүүхэд залуучуудын хөгжлийн газраас санууллаа.
