Баянгол дүүрэгт 2022 онд улс, нийслэл, дүүргийн төсвийн хөрөнгө оруулалтаар хэд хэдэн байршилд явган зам, тохижилтын ажлыг хийж байна.
Энэ ажлын хүрээнд Баянгол дүүргийн 4 дүгээр хороо, Замчдын гудамжийг “Нано Экологи” ХХК улсын төсвийн хөрөнгө оруулалтаар иж бүрэн тохижуулж байна. Тодруулбал, тус компани Замчдын гудамжны эхлэл хэсэг П.Жасрайн гудамжнаас Хатанбаатар Магсаржавын гудамж хүртэлх 480 зам буюу иргэдийн ярьдагаар БГД-ийн ЗДТГ-аас “Варьета чуулга”-ын зүүн талын уулзвар хүртэлх авто замыг шинэчлэн засварлахаас өнөөдрийн байдлаар зорчих хэсгийн хучилт, тэмдэг, тэмдэглэгээг хийгээд байна.
Мөн дээрх ажлын хүрээнд явган хүний замыг 1,8-2,5 метр болгож өргөтгөн шинэчилж, зам дагуу байгаа моддыг хөндөлгүйгээр тойруулан сандал тавих, гэрэлтүүлэг суурилуулах зэргээр тохижилтын ажлыг үргэлжлүүлэн хийнэ. Ингэснээр төрийн захиргааны байгууллагаар үйлчлүүлж буй иргэд болон оршин суугчид ая тухтай орчинд амрах орчин бүрдэнэ.
Ашиглагч болон гүйцэтгэгч компанийн зүгээс энэ ажлыг иргэд, оршин суугчдыг хөдөө орон нутаг руу зорьсон буюу хотын хөл хөдөлгөөн багассан үед хийж дуусгахаар төлөвлөн ажиллаж байна.
