Хэнтий аймгийн Баян-Овоо суманд “Хоршоологчдын улсын зөвлөгөөн-2022” зохион байгуулагдлаа.
Засгийн газрын хэрэгжүүлэгч агентлаг Жижиг дунд үйлдвэрийн газраас зохион байгуулсан тус зөвлөгөөнөөр Хөдөө аж ахуй бирж нь 21 аймгийн хоршооны төлөөлөгч нарт “Хоршоо биржийн арилжаанд оролцох боломж, үр ашиг” сэдвээр мэдээлэл, танилцуулга хийж ажилласан юм.
Тус зөвлөгөөнөөр төрийн байгууллагууд хоршооны талаар баримталж буй бодлого, хэрэгжүүлж буй арга хэмжээний талаар, хоршоодууд өөрсдийн сайн туршлагын талаарх танилцуулга мэдээлэл хийж туршлага солилцсон үр дүнтэй зөвлөгөөн боллоо.
Хоршоологчдын улсын зөвлөгөөнд оролцож буй төлөөлөгчид “Баялаг гүрэм” хоршооны үйл ажиллагаатай танилцаж, хонь хяргах, ноос пресслэх машины талаар зочдод мэдээлэл өгч, ноос хяргах машинаар нэг хонийг нэг минут 40 секундэд хэрхэн ноосолж байгааг үзүүлсэн юм.
“Баялаг гүрэм” хоршоо нь 2022 оны 1 дүгээр сард үүсгэн байгуулагдсан бөгөөд Хөдөө аж ахуйн бирж ТӨХК-аас түүхий эд бэлтгэлийн загвар хоршоо болгон хөгжүүлэхээр менежентийн болон хөрөнгө оруулалтын дэмжлэг үзүүлэн ажиллаж байна.
Тус загвар хоршооны таваар бэлтгэгчдийг Японы олон улсын Жайка “Нэмүү өртгийн сүлжээний мастер төлөвлөгөө боловсруулах” төсөл, “Дорнод монголын хуурай хээрийн тогтвортой ландшафт, биологийн олон янз байдлын хамгаалах” төсөлтэй хамтран цахилгаан хайчаар хонины ноос бэлтгэх технологийн сургалтад хамруулж мөн төслийн хөрөнгө оруулалтаар загвар хоршооны агуулахыг биржийн итгэмжлэгдсэн агуулахын шалгуур үзүүлэлт, стандартад нийцүүлэн шинэчлэн засварлаад байна.
