Монгол Улсын Засгийн газраас хоршооны салбарын хөгжлийг дэмжих, хууль эрх зүйн орчныг сайжруулах, төр болон хоршоог дэмжигч байгууллагуудын хамтын ажиллагааг өргөжүүлж, үр дүнг сайжруулж ажлын байрыг нэмэгдүүлэх, хоршоогоор дамжуулан түүхий эдийн бэлтгэн нийлүүлэлт, бүтээгдэхүүний үйлдвэрлэл, борлуулалтын сүлжээний оновчтой тогтолцоог бий болгох замаар орон нутаг, сумдын хөгжлийг дэмжих, хоршооны “Сайн засаглал”-ыг төлөвшүүлэн нийгмийн үнэлэмжийг дээшлүүлэх зорилгоор 2019 оны Засгийн газрын 362 дугаар тогтоолоор “Хоршоог хөгжүүлэх нийгмийн хэмжээний хөтөлбөр-III”-ийг баталсан.
Тус хөтөлбөрийн хоршоог хөрөнгө оруулалт, санхүү зээлийн бодлогоор дэмжиж, өрсөлдөх чадварыг дээшлүүлэх зорилтын хүрээнд “Загвар хоршоо”-г байгуулсан билээ.
Тиймээс Хөдөө аж ахуйн бирж ТӨХК “Загвар хоршоо” төслийн хүрээнд Хэнтий аймгийн “Баялаг гүрэм” хоршооны таваар бэлтгэгчдийг мэргэшүүлэх сургалтад хамруулж, гишүүдийн хонийг ноослох, ноос ангилж бэлтгэх, биржээр дамжуулан арилжихаар бэлтгэж байна.
Загвар хоршоо нь хоршооны гишүүдийн хонийг мэргэшсэн таваар бэлтгэгчээр бэлтгэж ангилан ялгалт хийн 100 хувь хяргасан ноосыг үндэсний үйлдвэрлэгч нарт биржээр дамжуулан арилжаалах юм.
