Ганцхан сарын дараа ардын хувьсгалын баяр наадам болно. Өнгөрсөн хоёр жилийн хугацаанд дэлхий нийтийг цочроосон Ковид цар тахлын улмаас баяр наадмаа тэмдэглэлгүй өнгөрөөсөн.
Энэ жил Ардын хувьсгалын 100, 101 жилийн ойн баяр наадмыг хамтад нь өргөн цар хүрээтэй тэмдэглэн өнгөрүүлэхээр шийдвэрлэсэн. Тиймээс иргэд баяр наадмаа үзэх гэж сэтгэл догдлон хүлээж байгаа. Гэтэл өнөөдрийг хүртэл баяр наадамд төсөвлөсөн мөнгийг олгоогүй талаар сошиалаар шуугьж байна.
Энэ талаар УДЭТ-ын жүжигчин Г.Амгаланбаатар “Үндэсний их баяр наадмын төсвийг баталсан боловч өнөөдрийг хүртэл нэг ч төгрөг шилжүүлээгүй байна. Наадам болоход сар хүрэхгүй хугацаа үлдлээ. Уран бүтээлчид өчнөөн долоо хоног хүлээлээ шүү дээ.Хил гааль хаалттай, бараа материалын үнэ хэд дахин өссөн байна. Үйлдвэрлэл хийх гол мэргэжилтэн болох зураач, гагнуурчин, хувцас дизайны хүмүүс мөнгөгүй учраас хөдлөхгүй байна. Ядаж урьдчилгаа авмаар байна гэдгээ хэлж буй. Бид аргаа бараад өнөөдөр пост бичлээ. Өмнөх жилүүдэд өдийд хамаг ажлаа нугалчихсан байдаг” гэдэг байр суурийг илэрхийлсэн.
Энэ талаар баяр наадмын Ерөнхий найруулагчаар томилогдсон төрийн соёрхолт Н.Наранбаатартай холбогдоход тэрбээр, “Би мөнгө төгрөгөөр оролцох хүн биш. Гэхдээ төсөв бол орж ирээгүй байна” гэсэн юм.
Үнэндээ энэ цаг үед хөлс хүчгүй хөдлөх хүн нэгээхэн ч байхгүй. Телевизүүд хүртэл баярын нэвтрүүлгээ сарын өмнөөс бэлдэж эхэлсэн. Гэтэл төрийн их баяр наадмын, тэрдундаа Ардын хувьсгалын 100, 101 жилийн ойн баяр наадмын нээлтийн бэлтгэл ажил эхлээгүй байгаа нь харамсалтай.
Дэлхийд Монголын нэрийг цуурайтуулдаг баяр наадмын нээлтийн арга хэмжээнд Соёлын яам болоод холбогдох байгууллагууд ач холбогдол өгч, анхаарлаа хандуулах нь зүйтэй бус уу.
Хоёр жил баяр наадмынхаа нээлтийг үзэж чадаагүй иргэд энэ жил наадмынхаа нээлтийг үзэхээр сэтгэл догдлон хүлээж байна. Сайхан тоглолтоор бэлэг барих гээд урлагийнхан маань ч бэлтгэлдээ гарахаар бэлдэж байгаа ч төсөв мөнгөгүйгээс зогсонги байдалд ороод байгаа юм.
Энэ асуудал хөндөгдөхтэй зэрэгцээд яаран сандран наадмын урьдчилгааг шилжүүлжээ.
Хоёр жилийн хугацаанд завсарласан наадмынхаа нээлтийг үзэх гэж сэтгэл догдолсон иргэдээ бодоод, Монгол наадмынхаа нээлтэд анхаарлаа хандуулаач, Соёлын сайд аа.
Монгол наадам царцанги байдалд байна.
