Олимпийн мөнгөн медальт Саиед Моллаей Азербайжаны төлөө барилдахаар боллоо. Олон Улсын Жүдо Бөхийн Холбооноос түүнийг Азербайжаны нэрийн өмнөөс барилдуулахыг зөвшөөрсөн байна.
Саиед Моллай энэ оны тавдугаар сарын 2-ноос эхлэн тус улсын нэрийн өмнөөс барилдах эрхээ авсан байна.
Энэ талаар Саиед Моллаей “Миний Монголын жүдо бөхийн холбоотой байгуулсан гэрээ дуусгавар болсон. Дараа нь би, Азербайжаны жүдогийн холбоонд санал тавьж, тус улсыг төлөөлөх хүсэлтэйгээ илэрхийлсэн. Одооноос эхлэн төрөлх Азербайжан улсынхаа далбаан дор барилдах болсондоо баяртай байна. Дэлхийн аварга, Европын аварга, 2024 оны Парисын олимпийг хүлээж тэсэхгүй нь. Бидэнд цаг бага байна. Би өндөр амжилт үзүүлэхийн төлөө, чадах бүхнээ дайчилна” гэжээ.
