Жил бүрийн дөрөвдүгээр сарын 30-ныг “Хүүхдийг зодож шийтгэхийг таслан зогсоох олон улсын өдөр” болгон Хүүхдийн эрхийн тухай Конвенцид нэгдсэн улс орнууд 1998 оноос тэмдэглэж ирсэн.
Хүүхдийн эсрэг хүчирхийллийг нийгмээрээ үл тэвчиж, хүүхдийн бие махбод, сэтгэл санааны шийтгэлийг таслан зогсоож хүүхдийн өмнө үүрэг хүлээгчид бид тэднийг сонсдог, хүндэлдэг, ойлгодог, хайрладаг, итгэлийг нь даадаг дотны найз нь байцгаая.
Хүүхэд бурууг хийсэн үед яагаад буруу болохыг нь тайлбарла, хүүхэд санаатай алдаа хийдэггүй. Та түргэн авираар гар хүрснээр хүүхэд та хоёрын хоорондох итгэлцлийг үгүй хийдэг. Хүүхэд зөв ч бай буруу ч бай аливаа зүйлээ танаас нууцаар хийдэг, эсвэл ямар нэг шинэ зүйлийг турших, хийх хүсэл огт байхгүй болдог.
Хүүхдийг байнга зодож шийтгэх нь тэдний өөртөө итгэх итгэлийг үгүй хийдэг. Сул дорой, олон нийтийн дунд өөрийгөө илэрхийлэх чадвар сул болдог.
