Өнөөдөр /2022.03.07/ Төрийн ордонд “Тэгш боломж-Хамтын үр дүн” төрийн захиргааны албан хаагч эмэгтэйчүүдийн анхдугаар чуулган боллоо.
Энэ үеэр Хөдөлмөр, нийгмийн хамгааллын сайд А.Ариунзаяа хэлэхдээ, “Монгол Улсад яг одоо 3,3 сая хүн амтай байна. 2,1 сая иргэн ажиллах боломжтой хөдөлмөрийн насныхан нь гэж явдаг. Харин үүнээс 1,2 сая иргэн нь хөдөлмөр эрхлээд байна.
Хөдөлмөрөөс гадуурх хүн амын хувьд 800-900 мянга орчмын 65 хувь нь эмэгтэйчүүд байна. Энэ юутай холбоотой вэ гэхээр хүүхэд болон ахмад настнаа асрах эсвэл жирэмсний амралт ч юмуу асуудлуудтай холбоотой. Нэн ялангуяа сая цар тахлын үед хөдөлмөрийн оролцооны түвшин үзүүлэлт байдаг. Энэ дээр аваад үзвэл эрэгтэйчүүд, эмэгтэйчүүдийн хоорондын зөрүү 25 хувь байна. Эмэгтэйчүүд эрэгтэйчүүдийг бодвол 25 хувиар бага хөдөлмөрийн зах зээл дээр оролцоод байна гэсэн тоо баримт гарсан. Мөн энэ нь цар тахлын үед сургууль цэцэрлэг ажиллахаа больсонтой шууд холбоотой. Өнөөдөр эмэгтэйчүүдийн хөдөлмөр эрхлэлтийг дэмжье гэж бодож байвал хүүхдийн хөгжил, хүмүүжил асаргааны асуудал яригдах ёстой.
Өнөөдрийн үйл ажиллагааны хувьд бол захиргааны албан тушаалтнуудын хувьд эмэгтэйчүүдийн оролцоо, манлайлал гэсэн сэдэвтэй чуулган явагдаж байгаа юм. 2021 оноос хойш цалинтай эцэг, эх гэсэн санаачлалаар хүүхэд харах бол зөвхөн эмэгтэйчүүдийн асуудал биш, эрэгтэй хүний оролцоо ч гэсэн чухал гэснийг хуульчилж оруулж ирсэн” гэв
