Хан-Уул дүүргийн Прокурорын газраас яллагдагч Н.Түвшинбаярт холбогдуулан Эрүүгийн хуулийн тусгай ангийн 11.1 дүгээр зүйлийн 2 дахь хэсгийн 2.1 дэх заалтад зааснаар “Хүний эрүүл мэндэд хүнд хохирол санаатай учруулах” гэмт хэрэгт яллах дүгнэлт үйлдэж ирүүлсэн эрүүгийн хэргийг Хан-Уул дүүргийн Эрүүгийн хэргийн анхан шатны шүүх 2021 оны 12 дугаар сарын 23-ны өдрийн шүүхийн урьдчилсан хэлэлцүүлгээр хянан хэлэлцлээ.
Улмаар Эрүүгийн хэрэг хянан шийдвэрлэх тухай хуулийн 33.3 дугаар зүйлийн 1 дэх хэсгийн 1.2 дахь заалтад зааснаар “шүүх хуралдаанаар нөхөн гүйцэтгэх боломжгүй мөрдөн шалгах ажиллагаа хийлгэхээр хэргийг тус дүүргийн прокурорын газарт буцааж шийдвэрлэлээ.
Шүүхээс яллагдагч Н.Түвшинбаярт урьд авсан цагдан хорих таслан сэргийлэх арга хэмжээг прокурорт очтол хэвээр үргэлжлүүлж шийдвэрлэв.
Энэ үеэр Н.Түвшинбаярын өмгөөлөгч Н.Данзанноров, “Н.Түвшинбаярын хувьд тодорхой хэмжээнд гарсан хохирлыг төлж байгаа. Нийт гурван тэрбумын хохирлыг нөхөн төлсөн. Цаашдаа ч гарах хохирлыг төлөх ёстой. Хэргийг нэмэлт мөрдөн хийхээр прокурорт буцсан. Гэм буруутай эсэхтэй маргахгүй. Хохирогчийн эрүүл мэнд чухал.
Н.Түвшинбаярын тухайд маш их гэмшиж байгаа. Хэргийг прокурорт буцаах шийдвэр гаргалаа” гэлээ.
