Иргэд, даатгуулагчдад эрүүл мэндийн даатгалын үйл ажиллагаатай холбоотой мэдээллийг албаны эх сурвалжаас хүргэдэг ээлжилт LIVE нэвтрүүлэг боллоо.
Энэ удаа УГТЭ-ийн Зүрх судасны тасгийн эрхлэгч, Тэргүүлэх зэргийн эмч, Клиникийн профессор Д.Бат-Ундрал оролцож “Зүрхний судасны өвчний тусламж, үйлчилгээ ба Эрүүл мэндийн даатгал” сэдвийн хүрээнд мэдээлэл өглөө.
-Зүрх судасны өвчин үүсэх гол шалтгаан юу вэ?
-Зүрх судасны өвчлөл бол Монголд төдийгүй дэлхий нийтэд маш тулгамдсан асуудал болоод байна. Зүрх судасны өвчнөөр жилд 17 сая иргэн нас бардаг гэсэн тооцоо байдаг. Монголд бол 2020 оны байдлаар 10,000 хүн тутмын 16 хүнд зүрх судасны өвчний улмаас нас бардаг гэсэн тооцоо байдаг. Зүрх судасны өвчний шалтгаан гэвэл маш олон байдаг. Хамгийн түгээмэл шалтгаан нь судас хатуурах, зүрхний шигдээс байдаг. Гэхдээ сүүлийн үед иргэдийн эрүүл мэндийн боловсрол дээшилсэн байгаа юм.
-Улсын 3 дугаар эмнэлгийн тухайд зүрх судасны өвчлөлөөр мэс засал хийдэг төрөлжсөн томоохон эмнэлэг. Жилдээ хэчнээн хүнд мэс засал хийж байна. Техник технологийн хувьд хэр сайжирсан бэ?
-2020 оны байдлаар 3 дугаар эмнэлгээр 162 мянган иргэн эмнэлгийн тусламж үйлчилгээ авахаар хандсан байдаг. Үүнээс 40 мянга 787 өвчтөн зүрх судасны өвчний улмаас хандсан байна. Харин 10 мянга орчим нь хэвтэж эмчлүүлсэн. Зүрх судасны кабинетэд 10945 өвчтөн хандаж 1514 өвчтөн хэвтэж эмчлүүлсэн байна. Үүнээс 980 зүрх судасны мэс засал хийлгэжээ. Сүүлийн жилүүдэд манай эмнэлэгт шинэ техник технологи нэвтрэх ажил хийгдэж байна.
-Эрүүл мэндийн даатгалаар зүрх судасны өвчлөлийг хэрхэн эмчилж байна вэ?
-2015 он хүртэлх байдлыг авч үзэхэд зүрхний мэс засалд ороход багаж хэрэгслийг өвчтөн 100 хувь өөрсдөө худалдан авч хийлгэдэг байсан. 2015 оноос хойш зүрхний мэс заслын үндсэн багаж төхөөрөмжийг шийдэж өгсөн. Зүрхний мэс засалд орох өвчтний 75 хувь нь даатгалаас 25 хувийг иргэн өөрөө гаргаж байсан. Гэсэн хэдий ч 25 хувийг өөрөөсөө гаргаж оруулах боломж багатай өвчтөн олон байсан. Харин энэ оны 3 дугаар сараас 03 дугаар тогтоол хэрэгжиж эхлээд энэ байдалд нэлээн их өөрчлөлт орж байна. Шинэ тогтоолоор хүүхдийн зүрхний төрөлхийн гажгийн мэс заслыг 100 хувь төр дааж байгаа. Мөн төрөлхийн гажигтай насанд хүрсэн хүний эмчилгээг 100 хувь төр санхүүжүүлж эмчилгээ хийгдэж байна.
Үргэлжлэлийг бичлэгээс үзнэ үү
