Өнөөдрөөс урлаг, спортын зарим арга хэмжээг нээж байгаа билээ. Үүнтэй холбогдуулан УОК, НОК хамтарсан мэдээлэл хийлээ.
Монгол Улсын Ерөнхий сайд Л.Оюун-Эрдэнэ: Монгол Улс нийтдээ 6 удаа хатуу хөл хорио тогтоосон. Хатуу хөл хорионоос болж Монголын эдийн засаг түүхэндээ хоёр дахь удаагаа хасах үзүүлэлт рүү орсон. Зөвхөн Монголын хувьд ч биш дэлхий нийтэд эдийн засгийн нөхцөл байдал хүндэрсэн.
Өнөөдөр бол Монгол Улсад тэмдэглэгдэн үлдэх өдөр. Яагаад гэвэл урлаг, спортын салбар 50 хувийн дүүргэлттэй үйл ажиллагаа явуулж эхлэх гэж байна.
Иргэд дархлаажуулалтад идэвхтэй хамрагдсан учраас цаашид хөл хорио тогтоохгүйгээр хэвийн амьдарна. Саяхан Covid-19-ийн вакцинжуулалт дөнгөж эхэлж байсан бол өнөөдөр вакцины хангалттай нөөц байна. Дэлхийн олон улс оронд вакцин хийж эхлээгүй байгаа. Гэхдээ бид вакцинжуулалтдаа цаг тухайд нь идэвхтэй хамрагдаж хичээлээ танхимаар эхлүүлж чадсан.
Өнөөдрөөс эхлэн баяр ёслол, үзвэр үйлчилгээний үйл ажиллагаанд хамрагдаж байгаа хүн түргэвчилсэн шинжилгээг хийх шаардлага тавина. Түргэвчилсэн шинжилгээ 20 мянган төгрөгийн төлбөртэй ч өөр хувилбар бий. Хэрэв гурав дахь тундаа хамрагдсан бол түргэвчилсэн оношлуураар шинжилгээ хийлгэх шаардлагагүй. Мөн эрүүл мэндийн салбарыг зохион байгуулалтад оруулж үзвэр үйлчилгээний газрын гадна түргэвчилсэн оношлуураар шинжилгээ өгөх боломжийг бүрдүүлнэ.
Хувийн хэвшлийн салбарыг Засгийн газраас илүүтэй дэмжихийг зорьж байгаа. Улбар шар түвшинд байгаа ч дараа дараагийн салбаруудыг нээхээр төлөвлөж байгаа. Хэрэв зорилтот бүлгийн 50 хувь нэмэлт тунд хамрагдвал “шар” түвшинд тун удахгүй шилжих болно.
