Шадар сайд С.Амарсайхан: Өдөрт бүртгэгдэх халдварын тохиолдлын тоо 2000 давж, нөхцөл байдал хүндэрч байна. Үүнийг дагаад нас баралт нэмэгдэж байна.
Эмнэлэг ачааллаа дийлэхгүй нөхцөл байдал үүсч байна. Өнөөдрийн байдлаар 8000 орчим иргэн гэрээр тусгаарлагдаж байна. Эмнэлгийн ачаалал илүү хүндэрнэ. Насанд хүрсэн нийт хүн амын 60 хувь буюу 750 мянган иргэн давтан тунд хамрагдсан. Дархлаажуулалтын ажил бүрэн дуусаагүй байна. Бид халдвар хамгааллын дэглэмээ сахих ёстой. Вакцин хийлгээд тайвширч болохгүйг мэргэжлийн байгууллагаас сануулсаар ирсэн. Хүн амын 36.5 хувь буюу нэг сая гаруй хүүхэд вакцинд хамрагдаагүй байна. Энэ долоо хоногт 12-17 насны хүүхдийг “Файзер” вакцинд хамруулах ажил хийнэ.
Хатуу хөл хорионы дараа эдийн засгийг сэргээхээр худалдаа, үйлчилгээний байгууллагын үйл ажиллагааг үе шаттайгаар нээсэн. Гэвч өнөөдөр халдварын тархалт нэмэгдэж, нөхцөл байдал хүндрээд байна. Эрүүл мэндийн салбараас судалгаа явуулж байгаа бөгөөд одоогоор коронавирусийн шинэ төрөл манай улсад дэгдэх магадлал өндөр байна. Иймээс нэн хүнд өвчтнүүдийн тоог багасгах, нас баралтыг бууруулах чиглэлээр ажиллаж байна.
Энэ хүрээнд амралтын газруудын үйл ажиллагааг түр хугацаанд зогсоож, хоолны газруудыг заалаар үйлчлэхийг хориглох санал гаргаад байна. Саналаа Засгийн газрын хуралдаанд оруулна.
