Ерөнхийлөгчийн сонгуульд МАН-аас нэр дэвшигч У.Хүрэлсүх өнөөдөр 07.30 цагт Баянзүрх дүүргийн 48-р сургуульд саналаа өгчээ. Түүний хамт 2 охин нь саналаа өгсөн юм. Түүний бага охин энэ жил 18 нас хүрсэн бөгөөд анхны сонгуулиа өгч байгаа юм байна.
Тэрбээр, Энэ жил Монгол Улсын түүхэнд тэмдэглэгдэх олон ой тохиож байна. Энэ жил Ардын хувьсгалын 100 жилийн ой, Монгол Улсад төрт ёс үүсэн байгуулагдсаны түүх 2230 ой, НҮБ-д гишүүнээр элссэний 60 жилийн ой гээд Монгол Улсын түүхэнд онцлогтой жил болж байгаа. Энэ сайхан жил Монгол Улсын Төрийн тэргүүний сонгууль давхар явагдаж байгаа нь билэг дэмбэрэлтэй сайхан үйл явдал болж байна. Монгол хүн бол Монгол Улсын баялаг. Бидэнд олон баялаг бий. Байгалийн баялаг байна. Монголын ард түмэн өөрсдөө бас баялаг. Энэ ард түмний оюун санаа нь асар том баялаг. Монгол Улсын үүх түүх, соёл, бичиг үсэг гээд олон баялгийн эзэн болсон монголчууд байх ёстой гэж боддог.
Надтай хамт нэр дэвшсэн хоёр эрхэм нэр дэвшигчдийнхээ сонгуульд өндөр амжилт хүсье. Д.Энхбат нэр дэвшигч маань эмнэлэгт байгаа. Хурдан эдгэрээрэй гэж хүсье. Ард түмнээ сонгуульд идэвхтэй оролцохыг уриалж байна гэв.
