Энхрий бяцхан хүүхэд, багачууд, багш, сурган хүмүүжүүлэгч, эцэг эхчүүд Та бүхэндээ Олон улсын Хүүхдийн эрхийг хамгаалах өдөр, Хүүхдийн баярын мэнд дэвшүүлье.
Анх 1925 онд Швейцарь улсын Женев хотноо чуулсан “Хүүхдийн сайн сайхны төлөө Дэлхийн улс орнуудын чуулга уулзалт”-аас уриалан, жил бүрийн 6 дугаар сарын 1-ний өдрийг “Олон улсын хүүхдийн эрхийг хамгаалах өдөр” гэж зарласан түүхэн үйл явдлаас хойш 96 дахь жилдээ тэмдэглэж байна.
Манай улс 1952 оны 6 дугаар сарын 1-ний өдрөөс эхлэн, энэ өдрийг “Хүүхдийн баяр” хэмээн ёсчилж, үр хүүхдийнхээ төлөө цаг зав, сэтгэл оюун, халуун дулаан хайраа зориулах баярт мөчүүдийн нэг болгон эх үрсээрээ, гэр бүлээрээ хамтдаа өнгөрүүлэх боломжийг бүрдүүлэхэд төр засгаас онцгойлон үзэж, амралтын өдөр болгон тэмдэглэж, 69 дахь жилийг угтлаа.
Монгол Улс даяар энэ жил Хүүхдийн эрхийг хамгаалах өдөр, Хүүхдийн баярыг “НЭГДҮГЭЭРТ ХҮҮХЭД” уриан дор тэмдэглэж байгаа бөгөөд хүүхэд, гэр бүлд ээлтэй, нийгмийг байгуулахын төлөө төрийн үйлчилгээнд “Нэгдүгээрт хүүхэд” гэсэн зарчмаар манлайлан ажиллахыг байгууллага, аж ахуйн нэгж, иргэддээ уриалж байна.
Монгол Улсын Их Хурал, Засгийн газар 1996 онд Хүүхдийн эрхийг хамгаалах тухай, 2016 онд Хүүхдийн эрхийн тухай, Хүүхэд хамгааллын тухай, Гэр бүлийн хүчирхийлэлтэй тэмцэх тухай бие даасан хуулиудыг баталж, хэрэгжилтийг ханган ажиллаж байна.
