Гавьяат эмч А.Амбасэлмаа коронавирусийн талаарх зөвлөмж мэдээллийг хүргэлээ.
Тэрбээр “Дэлхий нийтэд тархсан цар тахлын бүхий л үе шатыг Монгол Улс дамжин өнөөгийн түвшинд хүрлээ. Өнөөдрийн байдлаар цар тахал нийт хүн амын дунд өргөн хүрээнд тархаад байна. Энэ үед хүндрэл, нас баралт явагддаг.
Улсын хэмжээнд өнөөдрийн байдлаар цар тахал бүртгэгдсэнээс хойш нийт 50.000 орчим тохиолдол бүртгэгдлээ. Үүний 87 хувь нь нийслэл Улаанбаатар хотод бүртгэгдлээ. Зөвхөн эмнэлэгт хэвтсэн тохиолдол 3670 байхад 3355 нь Улаанбаатар хотод бүртгэгдээд байна. Өргөн тархалттай, хүн амын дунд халдвар тархсан энэ үед аль болох хохирол багатай даван туулахын тулд нийтээрээ тэмцэх ёстой.
Халдвар хүн амын дунд өргөн хүрээнд тархахад хүндрэл их явагддаг. Тухайлбал, эмчлүүлж байгаа хүмүүсийн 51-55 хувь нь хүндэвтэрээс нэн хүнд хэлбэрт байна. Энэ бол тархалт ихтэй байгаагийн гол үзүүлэлт. Улаанбаатарын голомтоос бүртгэгдсэн тохиолдлын тоо хүндрэх эрсдэл өндөр байна.
Хүн бүр хичээж ажиллах цаг болоод байна. Халдвар өргөн хүрээнд тарсан энэ үед хэн ч бултах боломжгүй. Дархлаажуулалтын эхний тунгаа хийлгэчихээд халдварт өртөхгүй боллоо гэж иргэд андуурч байна. Халдвар хамгааллын дэглэмээ ягштал баримтлах хэрэгтэй. Дархлаажуулалтын бүрэн тунд хамрагдсан ч халдвар хамгааллын дэглэмийг баримтлах ёстой* гэлээ.
