МАН, МАХН нэгдэх “Эв нэгдлийн гэрээ*-нд гарын үсэг зурах ёслолын үйл ажиллагаа өнөөдөр болж байна. Үүнтэй зэрэгцэн УИХ-ын гишүүн С.Ганбаатар МАХН-аас гарах өргөдлөө хүлээлгэн өглөө. Тэрбээр “МАН-ын 62 суудлыг 63 болго гэж намайг сонгоогүй учраас МАХН-аас гарч байна* хэмээжээ.
МАХН-ын дарга Н.Энхбаярын хувьд “С.Ганбаатар дарга сайн нэр дэвшигч байна гэдэгт бид эргэлзэхгүй байгаа. Гэхдээ бид энэ асуудлаар ний нуугүй ярилцсан. С.Ганбаатар минь чи бид хоёр Оюутолгойг өөрчилье, Дубайн гэрээг хүчингүй болгоё, байгалийн баялагийг ард түмэндээ өгье гэж байгаа. Хоёулаа яг энэ ажлыг бодитой хийж чадах 62 хүнтэй хамраад хийх боломж байсаар байтал заавал тийм хүнд замаар явж эдэнтэйгээ сөргөлдөж, хоорондоо хагаралдаж явах нь утгагүй юм. Ингэж амьдралаа, цаг хугацааг үрэн таран хийж болохгүй гэж бид ярилцсан. С.Ганбаатар дарга маань ойлгосон гэж найдаж байна* хэмээж байсан юм.
Гэвч тэд ойлголцолд хүрч чадсангүй бололтой. С.Ганбаатар МАХН-аас гарснаар АН-д элсэж, Ерөнхийлөгчийн сонгуульд нэр дэвшинэ гэх таамаг хөвөрч байгаа юм.
