ХӨСҮТ-ийн Эрчимт эмчилгээний тасаг буюу “улаан бүсэд* ажиллаж буй эмч Б.Болор-Эрдэнэ эрчимт эмчилгээний тасгаас шууд холбогдон мэдээлэл өглөө.
Тэрбээр, Хүнд өвчтөн нэмэгдэх хэрээр нас баралт нэмэгдэж байна. Манай тасагт яг одоо найман хүн эмчлүүлж байна. Өчигдөр уг нь 10 байсан боловч хоёр хүн нас барлаа. Дураараа өөрсдийгөө эмчлэх гэж оролдсон хүмүүс байна. Дархлаа муутай, суурь өвчтэй хүмүүсийн биеийн байдал амархан хүндэрч байна.
Өглөө бүр өгч буй мэдээллийг сайтар тусган авч халдвар хамгааллын энгийн дэглэмээ маш сайн барих хэрэгтэй. Хэрэв зовиур илрээд, хүндэрвэл эмнэлэгт заавал ханд. Авч байгаа арга хэмжээ нь тухайн хүний биеийн онцлогоос шалтгаалж өөр учир хүндэрсэн үед дур мэдэн эмчлэхгүй байхыг зөвлөж байна.
Зайлшгүй биш л бол гарах шаардлагагүй. Гарахаар бол халдвар хамгааллын дэглэмээ сайн сахих хэрэгтэй. Сувилагч нар маань 5-7 цагийн турш өвчтөний хажууд байж байна. Covid-19-ийн өвөрмөц эмчилгээ хийхгүй байгаа ч өндөр хөгжилтэй орнуудын хийдэг эмчилгээг л хийж байна. Бид эрчимт эмчилгээний тасагт 14 хоног тасралтгүй ажилладаг. Ажлаа дуусгаад тусгаарлалтад 7 хоног байдаг.
Одоо 22 хоног эрчимт эмчилгээний тасагт хэвтэж буй хүн байна. Амьсгалж чадахгүй, амьсгалын аппараттай амьсгалдаг. Нэг өрөөнд гурван хүн байдаг ба өнөө өглөө энэ өрөөний нэг өвчтөн өөд болсон. Эдгээр өвчтөн байнгын асаргаан дунд байх ёстой ба бид дэргэдээс нь холдож болохгүй нөхцөлд ажиллаж байна.
