УОК-ын дарга, Шадар сайд С.Амарсайханы гэргий аав, ээжийгээ сахина хэмээн ХӨСҮТ-д нэг хоноод гарсан гэх мэдээлэл гарч байна. Шадар сайдын эхнэр ХӨСҮТ-ийн улаан бүсэд нэвтэрсэн нь гамшгийн үед баримтлах зарчмыг зөрчсөн болж таарч байгаа юм.
Тэгвэл энэ талаар Шадар сайд мэдээлэл хийлээ. Тэрбээр, Зарим хэвлэл мэдээллийн байгууллага цаг үеийн асуудлаар тодруулга, тайлбар авах хүсэлт тавьсан учраас мэдээлэл өгөхөөр боллоо. Би өнөөдөр тайлбар хийж байгаа нь хэн нэгнийг зөвтгөж, буруутгах гэж хийж байгаа юм биш. Иргэдэд бодит мэдээлэл өгөх ёстой. Манай эхнэрийн аав 100 хувь асаргаанд байдаг, 80 настай хөгшин. Хоёр хөгшин хоёулаа Covid-19 авсан нь батлагдсан. Тиймээс халдвар хамгааллын дэглэмээ барьж, ХӨСҮТ рүү эхнэр маань хүргэж өгсөн.
Манай эхнэрийн хувьд, халдвар гарсан голомт буюу аав, ээжийнхээ гэрт тусгаарлагдах ёстой гэсэн мэргэжлийн байгууллагын заавар, зөвлөгөөний дагуу тэндээ тусгаарлагдаж байгаа. Түүнчлэн хоёр, гурван удаагийн шинжилгээний хариу сөрөг гарсан байгаа. 4-5 хоногийн дараа тусгаарлалтын хугацаа нь дуусна. Дэглэм журмыг миний гэр бүл зөрчих ёсгүй. Тэр тал дээр олон нийтийн хөндөж байгаа сэдэв болон бусад асуудлуудаар хэн ч давуу эрх эдлэх ёсгүй.
Ахмад настнуудад энэ халдвар асар хүнд тусч байгааг би өөрөө мэдэрч явна. Тиймээс иргэддээ ахмадуудаа асар сайн харж, хамгаалж, халдвараас сэргийлэхэд анхаарах шаардлагатайг анхааруулан хэлье. Манай эхнэр халдварын эрсдэл өндөр байгаа голомтоос гэртээ ирээгүй* гэв.
Мөн би албан тушаалтай зууралдахгүй. Тэгэх ч шаардлагагүй. Би цар тахалтай тэмцэж байгаа. Үүнийг даван туулахын тулд хэн хэндээ дэмжлэг үзүүлж, дүрэм журмаа мөрдөж явах ёстой. Улс төрийн зорилгоор энэ асуудалд бүү хандаарай. Сонгууль дөхүүлээд халдварын тоог нэмж хэллээ гэх нь байна. Ийм зүйл огт байхгүй.
Залуустаа хандаж хэлэхэд цар тахлын үед дэглэмээ сайтар бариарай. Цаашид тархалт улам нэмэгдэх эрсдэл бий. Халдварт өртөж хамгийн хүнд тусаж байгаа нь ахмад настнууд шүү* гэлээ.
