“Эрүүл мэндээ хамгаалж, эдийн засгаа сэргээх 10 их наяд” хөтөлбөрийг Засгийн газраас баталсан билээ. Энэ төлөвлөгөөнд залуучуудын хөдөлмөр эрхлэлтийг дэмжихэд 500 тэрбум төгрөгийг зарцуулна. Үүнийг төсөв дотроо зохицуулалт хийх замаар гаргана. Түргэвчилсэн вакум сургалтад залуусыг хамруулах нэг сая төгрөгийн нэг сарын хугацаатай тэтгэлэгт хөтөлбөрийг зарлана гэсэн байгаа юм. Харин энэ зардлыг залуусын фитнест явах хоёр сарын төлбөрийг төрөөс даахаар болсон гэх цахим орчинд тархсан. Гэтэл энэ нь ташаа мэдээлэл гэнэ.
Хөдөлмөр, нийгмийн хамгааллын яам бэлтгэл ажлыг хангасан бөгөөд ирэх сарын 1-нээс ажилгүй 500 залууг сургалтад хамруулахаар болжээ. Уг сургалт нь залууст богино хугацаанд мэргэшил олгоод, цалин өгөх бодлого юм. Өөрөөр хэлбэл, ажилгүй байгаа залуусыг хоёр сарын хугацаатай багц сургалтад суулгаж, мэргэшил олгож, ажлын байранд бэлдээд нэг сая төгрөгийн урамшуулал олгоно хэмээн Хөдөлмөр нийгмийн хамгааллын сайд А.Ариунзаяа хэллээ.
Тэрбээр “ХНХЯ-ны хувьд халамжаас хөдөлмөрт шилжинэ гэсэн томоохон зорилтыг дэвшүүлж байгаагийн дотор Засгийн газрын залуучуудын хөдөлмөр эрхлэлтийг дэмжих бодлоготой маш сайн уялдаж байгаа. Ажиллах хүчний судалгаанаас харахад 2020 оны дөрөвдүгээр улирлын байдлаар 90 мянга гарсан байсан. Үүээс гадна сар бүр хүнсний талон авдаг 43 мянган өрхийн 235 мянган иргэн бий. 43 мянган өрх дотор хөдөлмөрийн насны залуусыг ангилан авч үзээд нэг сая төгрөгийн тэтгэлэгтэй, нэг сарын хөдөлмөрт бэлтгэх сургалтыг явуулахаар хөтөлбөрөө бэлдэж байна” гэв.
Сургалтын зорилго нь мэргэжил олгох гэхээсээ илүүтэй хандлага, ур чадвар, өөрийгөө хөгжүүлэхэд тусалж, мэргэжлийн арга зүй олгоно. Баг хамт олон дотроо хэн юм, Монгол Улсын хөгжлийн зорилт хаашаа чиглэж байна, би юу хийж чадах уу гэх байдлаар залуучуудыг бэлтгэнэ.
Хэрэв сургалт амжилттай хэрэгжвэл 500 бус 5000 залууг хамруулах төлөвлөгөө бий гэнэ. Гэхдээ хөтөлбөрийг хэрэгжүүлж эхлэхээс өмнө ажлын байрны захиалгыг тодорхойлж, тэр хүрээндээ залуучуудыг сургах юм байна.
Ирэх дөрөвдүгээр сарын 1-ээс эхний ээлжийн 500 залуусыг авах төлөвлөгөөтэй байна. Цаашлаад сард 1000, бүр боломж нь бүрдвэл сард 5000 залуусыг сургана. Энэ жилийн хувьд 5000 залуусыг хөтөлбөрт хамруулах зорилго тавьсан байна.
